ერთიანი ნაციონალური მოძრაობა მოუწოდებს ქართულ ოცნებას, კიდევ ერთხელ განმარტოს, თუ რატომ არ დაუჭირა მხარი ევროსაბჭოს საპარლამენტო ასამბლეაში უკრაინის მხარდასაჭერად მიღებულ ორ რეზოლუციას.

ენმ-ში აცხადებენ, რომ საქართველოს ამჟამინდელი მთავრობა მოიქცა როგორც "ოკუპანტი სახელმწიფოს სატელიტი".

შეგახსენებთ, რომ ქართულმა დელეგაციამ უკრაინის მხარდამჭერი რეზოლუციების კენჭისყრაში მონაწილეობა არ მიიღო. ქართული ოცნების წევრების თქმით, ისინი კენჭისყრის დროს შვეიცარიის დელეგაციას ხვდებოდნენ.

"საქართველოსთვის ასეთი მნიშვნელობის კენჭისყრის დროს ნებისმიერი შეხვედრა არასაპატიო მიზეზია, რადგან შეხვედრის დრო შეიძლება შეიცვალოს. ამას გარდა, კენჭისყრის შედეგებიდან ირკვევა, რომ შვეიცარიის დელეგაციის წევრებს რეზოლუციებისთვის მხარი აქვთ დაჭერილი. ამრიგად, ქართული ოცნება კიდევ ერთხელ იქნა მხილებული უტიფარ და საქართველოსთვის საზიანო ტყუილში".

12 ოქტომბერს ევროპის საბჭოს საპარლამენტო ასამბლეამ უკრაინასთან დაკავშირებით შემდეგი რეზოლუციები მიიღო:

  • უკრაინაში რუსული აგრესიის პოლიტიკურ შედეგებთან დაკავშირებით
  • უკრაინის მიერ არაკონტროლირებად უკრაინულ ტერიტორიებზე ადამიანის უფლებათა დარღვევისას მათი დაცვის საშუალებების შესახებ

ენმ აცხადებს, რომ საქართველოს დელეგაციას არაფერი არ გაუკეთებია იმისათვის, რომ ამ რეზოლუციებში რაიმე ფორმით დაფიქსირებულიყო საქართველოს ტერიტორიების დეოკუპაციის და დევნილთა დაბრუნების თემატიკა. პარტიაში აცხადებენ, რომ მიღებული რეზოლუციები რუსეთის ქმედებების შეფასების თვალსაზრისით უზარმაზარი წინგადადგმული ნაბიჯია:

"ორივე რეზოლუცია ისტორიული მნიშვნელობისაა, რადგან მათში რუსეთის ქმედებები პირდაპირაა აღწერილი როგორც აგრესია, ხოლო ყირიმი და აღმოსავლეთ უკრაინა გამოცხადებულია რუსეთის მიერ ოკუპირებულ ტერიტორიებად სადაც ადამიანის უფლებებზე პასუხისმგებლად მთლიანად გამოცხადებულია ოკუპანტი სახელმწიფო".

ნაციონალური მოძრაობის შეფასებით, ევროსაბჭოს საპარლამენტო ასამბლეაზე საქართველოს დელეგაციის მიერ აღნიშნულ რეზოლუციების მიღებისას მონაწილეობის არ მიღება ზიანს აყენებს საქართველოს სუვერენიტეტსა და დამოუკიდებლობას.