საქალაქო სასამართლოს მოსამართლე ეკატერინე ბიწაძემ დისკრიმინაციულად არ მიიჩნია საზოგადოებრივი ტრანსპორტის გაჩერებებზე ანტიჰომოფობიური ბანერების განთავსებაზე უარი. ამის შესახებ ინფორმაცია On.ge-ს საქალაქო სასამართლოში დაუდასტურეს. საქმე ეხება კომპანია ალმას უარს 17 მაისს ჰომოფობიური ბანერების განთავსებაზე.

2019 წლის 17 მაისს თანასწორობის მოძრაობამ საჯარო მანიფესტაციის გამართვის ნაცვლად გადაწყვიტა, რომ ჰომოფობია თბილისის მეტროსა და ავტობუსის გაჩერებებზე ბანერებით გაეპროტესტებინა. კამპანიის ფარგლებში მომზადდა 11 ანტიჰომოფობიური ბანერი.

ორგანიზაციის ცნობით, პირველ ეტაპზე კომპანიასთან კომუნიკაცია წარმატებით მიმდინარეობდა, თუმცა მას შემდეგ რაც ვიზუალური მასალა მიიღეს, უარი განაცხადეს ბანერების განთავსებაზე და ხელშეკრულება გააუქმეს.

თანასწორობის მოძრაობის განცხადებით, კომპანიამ განმარტა, რომ ჰომოფობიის საწინააღმდეგო და თანასწორობის შინაარსის შემცველი ბანერები გაზრდიდა ვანდალიზმის საფრთხეს და რისკის ქვეშ დააყენებდა მგზავრების უსაფრთხოებას.

თანასწორობის მოძრაობის შეფასებით, ალმას მხრიდან განხორციელდა დისკრიმინაციული მიდგომა. მან დაარღვია ხელშეკრულება და უარი უთხრა თანასწორობის მოძრაობას, მომსახურების გაწევაზე დაუსაბუთებლად:

"მათი თავდაპირველი პოზიციით ხელშეკრულების შესრულებაზე უარის თქმის მოტივი იყო ის, რომ მათ ეკრძალებოდათ სოციალურ კამპანიებში ჩართვა და რეკლამების განთავსება. მიუხედავად იმისა, რომ ჩვენ მოვითხოვეთ აღნიშნული შეზღუდვის შესახებ სამართლებრივი საფუძვლების შესახებ ინფორმაცია, საპასუხოდ არაფერი მიგვიღია".

თანასწორობის მოძრაობა გადაწყვეტილების დასაბუთების ნაწილის ჩაბარების შემდეგ სააპელაციო სასამართლოს მიმართავს.