საქართველოს სამეფო კლუბი ყოფილ პრემიერს ბიძინა ივანიშვილს ღია წერილით მიმართავს და საპარლამენტო მონარქიის ჩამოყალიბებას სთავაზობს:

"ბატონო ბიძინა, თქვენ მოგმართავთ, რადგან, გუნდი, რომელიც 22 ოქტომბერს, თითქმის დარწმუნებული ვარ, საკონსტიტუციო უმრავლესობას მოიპოვებს, თქვენი ჩამოყალიბებულია და თქვენ ამ გუნდის წევრებზე დიდი გავლენა გაქვთ. ეს საკითხი, ყველა ვხვდებით რომ გადაწყვეტილია. გთავაზობთ საპარლამენტო მონარქიას. სახალხო, კონსტიტუციურ, შეზღუდულ, თანამედროვე მონარქიას".

წერილის ავტორი მიუთითეს იმაზე, რომ საპრეზიდენტო რესპუბლიკა თითქმის აღარ არსებობს და მხოლოდ ის შემორჩა მისგან, რომ ჯერჯერობით პრეზიდენტს ხალხი ირჩევს:

"თქვენს მიერ ჩამოყალიბებული გუნდის წევრებს, უკვე ყველამ ვიცით, გადაწყვეტილი აქვთ, შეცვალონ შესაბამისი ჩანაწერი კონსტიტუციაში, და შემდეგში, საქართველოს პრეზიდენტი აღარ ირჩეოდეს საერთო-სახალხო არჩევნების გზით, არამედ პრეზიდენტს ირჩევდეს ან პარლამენტი, ან პარლამენტს დამატებული რაიმე წარმომადგენლობითი ორგანო თუ სხვა".

სამეფო კლუბის სპიკერი წერს, რომ საპარლამენტო მონარქია, ფაქტობრივად იგივეა, რაც საპარლამენტო რესპუბლიკაა და რომ იგი გაცილებით იაფი დაჯდება:

"საპარლამენტო მონარქია გაცილებით იაფია, ვიდრე საპრეზიდენტო მმართველობა. საპარლამენტო მონარქიის დროს, მეფე დასჯერდება ზუსტად იმ ხარჯებს, რაც აუცილებელი იქნება საპარლამენტო რესპუბლიკის შემთხვევაში ქვეყნის პრეზიდენტისათვის, მისი კანცელარიისათვის და სხვა. ზუსტად ამ ხარჯებში ჩაეტევა საპარლამენტო მონარქიის შემთხვევაში მონარქი, მისი კანცელარია და სხვა.

ამგვარ მონარქიას ჩვენ ვუწოდებთ სახალხო მონარქიას, რადგან ასე ჰქვია ევროპის მონარქისტულ ქვეყნებში არსებულ სისტემას, და იგულისხმება, რომ სახელმწიფოში მეფესა და ხალხს შორის არ იქნება რაიმე ფენა, არისტოკრატია თუ სხვა, როგორც იყო ძველად. თანამედროვე სამყაროში ასეთი რამ აღარ არის საჭირო. არ იარსებებს არც სამეფო კარი, არც ვაზირობა და ა. შ. მხოლოდ მონარქის სამუშაო კანცელარია".

სამეფო კლუბის სპიკერი აღნიშნავს, რომ მათი იდეის განხორციელების შემთხვევაში, ქვეყნის მართვა გაგრძელდება ჩვეულებრივად, პარლამენტი იქნება საკანონმდებლო ორგანო, ხოლო პარლამენტის მიერ არჩეული მთავრობა განახორციელებს აღმასრულებელ ხელისუფლებას, მხოლოდ პარლამენტის მიერ არჩეული პრეზიდენტის მაგიერ:

"საქართველოში თუ აღდგება სამეფო ტახტი, საქართველოს დამოუკიდებლობისა და სახელმწიფოებრიობის აღდგენისა გზაზე ეს იქნება, კიდევ ერთი გადამწყვეტი და ისტორიული ნაბიჯი".