29 ოქტომბერს, 17:00 საათზე განათლების კოალიციის და ილიას სახელმწიფო უნივერსიტეტის ინიციატივითა და ორგანიზებით, სკოლის ლიდერობის ეროვნული კონკურსის პრეზენტაცია წიგნის მაღაზია ლიგამუსში გაიმართა.

მასწავლებლის ეროვნული ჯილდოს საყოველთაო წარმატების შემდეგ განათლების კოალიცია ამჯერად მთლიანად სკოლებისა და მათი დირექტორების წახალისებას გეგმავს. პრეზენტაციაზე ორგანიზატორებმა განაცხადეს, რომ კონკურსის მიზანი საჯარო სკოლის პრესტიჟისა და ავტორიტეტის გაზრდის მხარდაჭერაა, რასაც წარმატებული დირექტორების გამოვლენითა და მათი ფართო საზოგადოებისათვის გაცნობით აპირებენ. ამ კონკურსის მთავარი მიზანი სკოლის მართვის პრაქტიკის განვითარების ხელშეწყობა და სწავლა-სწავლების შედეგების გაუმჯობესებაზე მიმართული შიდა სასკოლო ძალისხმევის მხარდაჭერაა.

სკოლის ლიდერობის ეროვნულ კონკურსს განათლების კოალიცია ილიას სახელმწიფო უნივერსიტეტთან პარტნიორობით ახორციელებს. პრეზენტაციაზე ილიაუნის ჩართულობასთან დაკავშირებით უნივერსიტეტის წარმომადგენელი, ნინო დობორჯგინიძე გაგვესაუბრა:

"არ არსებობს წარმატებული საუნივერსიტეტო სისტემა წარმატებული სასკოლო სისტემის გარეშე, სწორედ ამიტომაც ილიას სახელმწიფო უნივერსიტეტი დიდი ენთუზიაზმით ერთვება ამ პროექტის განხორციელებაში. რჩეული მასწავლებლების გამოვლენის შემდეგ ახლა უკვე დროა გამორჩეული სკოლებიც აღმოვაჩინოთ, რადგან მჯერა, რომ ყველა სკოლას ჰყავს თავისი პირობითად ლადო აფხაზავა. ჩვენ კი გვინდა, რომ ასეთ მასწავლებლებს შევუქმნათ განსაკუთრებული მიკროსისტემა, სადაც ყველას ექნება საშუალება თავისი შესაძლებლობები სრულყოფილად გამოავლინოს."

კონკურსის შინაარსობრივ მხარეზე ისაუბრა განათლების კოალიციის თავჯდომარემ, ირინა ხანთაძემ:

"კონკურსი გათვლილია მხოლოდ საჯარო სკოლებზე, რომლის ფარგლებშიც გვინდა გამოვავლინოთ გამორჩეული სკოლები და მათი ხელმძღვანელები, რომლებიც თავიანთი შრომითა და მიდგომებით უზრუნველყოფენ საინტერესო სასკოლო ცხოვრებას."

კონკურსში მონაწილეების შერჩევა რამდენიმე კრიტერიუმის გათვალისწინებით მოხდება:

  • ისტორია და მოტივაცია;
  • სკოლის მართვა და განვითარება;
  • სწავლა - სწავლების ხარისხის განვითარება;
  • ინკლუზიური და პოზიტიური სასკოლო კლიმატის განვითარება;
  • რესურსების განვითარება და მოზიდვა.

კონკურსის შედეგად გამოვლინდება გრანპრის და კიდევ ორი სპეციალური ჯილდოს მფლობელი მონაწილე. გრანპრის მფლობელ დირექტორს პრიზის სახით 5 000 ლარი გადაეცემა, ხოლო სკოლას სპეც-პროექტის განსახორციელებლად 30 000 ლარი.

კონკურსი ხორციელდება გუდავაძე-პატარკაციშვილის ფონდის, თიბისი ბანკის, ტელეკომპანია იმედის, KPMG Georgia-სა და მარკეტინგული კომპანია 4media-ს მხარდაჭერით.