ევროკავშირმა საქართველოში განათლება დასაქმებისთვის პროგრამის ახალი ეტაპი დაიწყო. Skills4Jobs-ის ხუთწლიანი პროგრამის პრეზენტაცია 29 ოქტომბერს, გლდანის პროფესიულ კოლეჯში გაიმართა. ამ პროგრამის მთავარი მიზანია მოქალაქეებს შესაბამისი პროფესიული განათლება მისცეს და იმ უნარებით აღჭურვოს, რომელიც შემდეგ დასაქმებაში დაეხმარება. მის ფარგლებში 5 წლის განმავლობაში 105 000 საქართველოს მოქალაქის დასაქმებაში ხელშეწყობა იგეგმება.

გახსნის ცერემონიალის შემდეგ, ევროკავშირის ელჩმა, კარლ ჰარცელმა აღნიშნა, რომ პროგრამის პირველი ეტაპი წარმატებით დასრულდა და 30 000-ზე მეტმა ადამიანმა იშოვა სამუშაო ადგილი. მათი უმეტესობა თბილისსა და სხვა დიდი ქალაქებში დასაქმდა. ახალი ეტაპი მიზნად ისახავს, რომ პროგრამაში რეგიონებიც აქტიურად ჩაერთონ.

ფოტო: Global Vision Caucasus

"ჩვენ ვიცით, რომ ბევრი ახალი და უკეთესი სამუშაო ადგილის შექმნა საქართველოს მოსახლეობისთვის მთავარი პრიორიტეტია. ამიტომ, მე ძალიან ამაყი ვარ, რომ ახლა Skills4Jobs-ის მეორე ეტაპს ვიწყებთ. ამ პროგრამაში მთავარია, რომ ყველას, ვინც ისწავლის, ელოდებოდეს სამუშაო ადგილი. იმედი გვაქვს, ამ ახალი პროგრამით ჩვენს წვლილს შევიტანთ მომდევნო ხუთი წლის განმავლობაში 105 000 ახალი სამუშაო ადგილის შექმნაში. ჩვენ საქართველოს მთავრობასთან ერთად ასევე ვეცდებით, რომ სპეციალური ფოკუსი გვქონდეს რეგიონებზე, ქალებზე და მოწყვლადი ჯგუფებზე, რათა მათაც ჰქონდეთ პროფესიული განათლების სისტემაზე წვდომა. დარწმუნებული ვარ, რომ ეს ერთ-ერთი ყველაზე მნიშვნელოვანი პროგრამაა მათ შორის, რასაც საქართველოში ვახორციელებთ", — თქვა On.ge-სთან საუბრისას კარლ ჰარცელმა.

განათლება დასაქმებისთვის პროგრამის მთლიანი ბიუჯეტი 48,85 მილიონ ევროს შეადგენს და მისი მთავარი ამოცანებია:

  • პროფესიული განათლებისა და სწავლების მეშვეობით, საქართველოს მასშტაბით, 15-29 წლამდე ახალგაზრდების დასაქმების მაჩვენებლის სულ მცირე 10%-იანი ზრდა 2017 წელთან შედარებით;
  • რეგიონებში პროგრამის ფარგლებში გადამზადებულ დასაქმების მაძიებელთა სულ მცირე 20%-ის დასაქმება სამი თვის ვადაში;
  • ხუთწლიანი მოსალოდნელი ეროვნული უნარების ანგარიშის გამოქვეყნება.

გლდანის პროფესიულ კოლეჯში Skills4Jobs-ის პროგრამის ოფიციალური გახსნის შემდეგ საქართველოში შრომით ბაზარზე არსებულ გამოწვევებსა და პერსპექტივებზე პანელური დისკუსია გაიმართა. მოწვეულმა სტუმრებმა კოლეჯის სტუდენტების ნამუშევრები, ხელნაკეთი ნივთები და გასაყიდად გამზადებული პროდუქციაც დაათვალიერეს. აქ წარმოდგენილი სტენდები საკმაოდ მრავალფეროვანი იყო და ტექნიკის სფეროდან დაწყებული, ტანსაცმლის დიზაინით დამთავრებული. თითქმის ყველაფერს მოიცავდა.

ფოტო: Global Vision Caucasus

ფოტო: Global Vision Caucasus

ფოტო: Global Vision Caucasus

როგორც ცენტრის დირექტორმა, ნოდარ ხარაზიშვილმა On.ge-სთან საუბარში აღნიშნა, ევროკავშირის ელჩის სტუმრობა სტუდენტებისთვის კიდევ უფრო დიდი სტიმული იქნება.

"განსაკუთრებით გამოვყოფ გამოცდილების გაზიარებას, რომელსაც ჩვენი ევროპელი პარტნიორები ნამდვილად არ იზარებენ. საქართველოს შრომითი ბაზარი უფრო და უფრო უახლოვდება დასავლეთის ქვეყნების შრომის ბაზრებს...წელს დაიწყება პილოტირება ე.წ. სკოლის პროგრამირების ინტეგრირება მოხდება პროფესიული განათლების სისტემაში. ეს განსაკუთრებით მნიშვნელოვანია მეცხრეკლასელებისათვის, რომლებიც სკოლიდან გამოდიან და შემდგომ გზა ეჭრებოდათ უმაღლესი განათლებისკენ. რაც შეეხება კოლეჯის პროფილს, ჩვენი ძირითადი მიმართულებებია ავტომობილის ტექნიკური მომსახურების პროგრამები ავტომობილის დიაგნოსტიკოსი და ავტომობილის ელექტრიკოსი. ამ მხრივ ჩვენ საქართველოში ერთადერთები ვართ", — თქვა ნოდარ ხარაზიშვილმა.

გლდანის პროფესიულმა კოლეჯმა საქმიანობა 2014 წლიდან დაიწყო. ამჟამად აქ სწავლა 12 მოდალურ პროგრამაზეა შესაძლებელი. დირექტორის თქმით, პროგრამები მუდმივად იცვლება და ახლდება. აღსანიშნავია ისიც, რომ მოდალურ პროგრამებში დამსაქმებელიც უშუალოდაა ჩართული და სტუდენტი სამუშაოზე დაფუძნებულ ცოდნას იღებს. პროფესიული კოლეჯი მიღებას წელიწადში ორჯერ აცხადებს და ზოგიერთ პროგრამაზე მოთხოვნა იმდენად დიდია, რომ ერთ ადგილზე 12-17 აპლიკანტი უწევს ერთმანეთს კონკურენციას.

პროგრამა Skills4Jobs-ის ახალი ეტაპი სულ ცოტა ხნის წინ დაიწყო და წინ კიდევ ბევრი საინტერესო რამ გელოდებათ.