ლიკა ლორთქიფანიძეს და თათია აფრიამაშვილს 12-დღიანი პატიმრობა შეეფარდა. მაგდა მამუკაშვილს კი 4000-ლარიანი ჯარიმა დააკისრეს. სამივე აქტივისტს ქართული ოცნების დეპუტატი, მარიამ ლაშხი შეურაცხყოფისთვის ედავებოდა.

მაგდა მამუკაშვილის ადვოკატმა პუბლიკას განუცხადა, რომ პროკურატურამ აქტივისტზე ჯარიმის გამოყენება მოითხოვა, რადგან მას მცირეწლოვანი შვილები ჰყავს. რაც შეეხება ლორთქიფანიძეს და მამუკაშვილს, რომელთაც 12-დღიანი პატიმრობა შეეფარდათ, 20 წელს გადაუცილებელი სტუდენტები არიან.

მამუკაშვილის განცხადებით, ის ჯარიმის გადახდას არ აპირებს.

"კაპიკს არ გადავიხდი! დამიყადაღებენ ანგარიშებს 2 მცირეწლოვანი შვილის დედას და ნახავენ, რა შემიძლია და როგორ! "თიბისის" და "საქართველოს ბანკსაც" სათანადო პასუხს მოვთხოვ, თუ "ძირს რუსეთის დამპალი იმპერიის" დაძახების გამო ანგარიშებს დამიყადაღებენ!" — წერს მამუკაშვილი სოციალურ ქსელში.

17 მაისს, ქართული ოცნების დეპუტატ მარიამ ლაშხთან აქტივისტები მივიდნენ და "თავისუფლება რეჟიმის ტყვეებს!", "არა რუსულ რეჟიმს!" და "არა რუსეთის მონებს!" სკანდირებდნენ. ინციდენტის ამსახველი კადრები თათია აფრიამაშვილმა სოციალურ ქსელში გამოაქვეყნა.

მოგვიანებით, პლენარულ სხდომაზე მარიამ ლაშხმა განაცხადა, რომ ჩივილის მოტივი მისი მცირეწლოვანი შვილებია, რომლებიც 17 მაისს თან ახლდა და დასძინა, რომ "არავინ გაბედოთ და ჩემი შვილები მოძალადე კრიმინალებთან, რადიკალებთან და ექსტრემისტებთან არ შეადაროთ".

შეგახსენებთ, ადმინისტრაციულ სამართალდარღვევათა კოდექსში თებერვალში შესული ცვლილებით, საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით გამოიწვევს დაჯარიმებას 1500 ლარიდან 4000 ლარამდე ოდენობით ან ადმინისტრაციულ პატიმრობას 45 დღემდე ვადით.