"წყალტუბოს აღორძინებაზე" ბიძინა ივანიშვილის განაცხადს მთავრობის წარმომადგენლებისა და უმრავლესობის დეპუტატების ქება მოჰყვა. ინიციატივას გამოეხმაურნენ ეკონომიკური ბლოკის მინისტრები და პრემიერ-მინისტრი, გიორგი გახარიაც.

ბიძინა ივანიშვილი "წყალტუბოს აღორძინების პროექტს" გეგმავს. ქართული ოცნების განცხადებაში ნათქვამია, რომ ივანიშვილი 22-ვე სანატორიუმის, 9 აბანოს გამოსყიდვასა და მათ სრულ რეაბილიტაციას გეგმავს. ქართული ოცნების თავმჯდომარე აღნიშნავს, რომ მისთვის "მოგებაზე არაა საუბარი", არამედ, აპირებს, რეაბილიტირებული სანატორუმები "მნიშვნელოვანი ფასდაკლებით" გაასხვისოს.

"წყალტუბოს აღორძინების პროექტი იწყება. სოხუმი გველოდება, რომელსაც ჩვენს აფხაზ ძმებთან ერთად განვაახლებთ", — წერს საქართველოს პარლამენტის თავმჯდომარე, არჩილ თალაკვაძე.

მისი თქმით, ბიძინა ივანიშვილის დაფინანსებით წყალტუბო, უახლოეს წლებში, შესაძლებელია, გახდეს აღმოსავლეთ ევროპის უმნიშვნელოვანესი მიზიდულობის ადგილი — ჯანმრთელობისა და ტურიზმის ცენტრი.

"წყალტუბოს მასშტაბურ განვითარებას იწყებს პარტია ქართული ოცნების თავმჯდომარე!", — ასევე ფეისბუქპოსტით ეხმაურება ადამიანის უფლებათა დაცვის კომიტეტის თავმჯდომარე, სოფო კილაძე.

ქართული ოცნების დეპუტატის გიორგი ვოლსკის თქმით, "სავალალოა", რომ ოპოზიციის კრიტიკის გამო მას და მის თანაგუნდელებს ბიძინა ივანიშვილის ქველმოქმედებაზე თავის მართლება უწევთ:

"იმისათვის, რომ შენდება ტყე-პარკები, ბოტანიკური ბაღები; იმისათვის, რომ აშენდა საკონცერტო დარბაზი; იმისათვის, რომ ქუთაისი იქცევა განათლებისა და ჯანდაცვის რეგიონალურ ცენტრად; იმის გამო, რომ აბასთუმანი და წყალტუბო, ეს მარგალიტები საქართველოს მიწაზე, იქნებიან რეაბილიტირებული და იმის გამო, რომ მისი ოჯახის ერთ-ერთმა წევრმა მსოფლიო მნიშვნელობის ტრაგედიას გარკვეული თანხა შესწირა. ეს არის სტრატეგიული გათვლა, თორემ კარგად იციან ბობოხიძეებმა, რომ რეალურად საქართველოსთვის ეს ძალიან მნიშვნელოვანი პროექტებია".

ეკონომიკის მინისტრის, ნათია თურნავას განცხადებით, ბიძინა ივანიშვილის ინიციატივის ფარგლებში კურორტის აღდგენა არის "მთლიანად ქველმოქმედება":

"მე ხაზს ვუსვამ, რომ ეს არის საქველმოქმედო ინიციატივა. რეალობამ გვიჩვენა, რომ ბიზნესი ვერ უმკლავდება ამ ყველაფერს სტანდარტული მიდგომით, რადგან ეს არ არის ბიზნესურად მომგებიანი პროექტი. ბატონმა ბიძინამ ბრძანა, რომ ის თავის თავზე იღებს ამ ქალაქის რეაბილიტაციისთვის აუცილებელ ყველა ხარჯს, რაც ასეულობით მილიონია".

პრემიერ გიორგი გახარიას თქმით, ბიძინა ივანიშვილი ყოველთვის საქმით დგას იქ, სადაც სჭირდება ქვეყანასა და ხალხს:

"წყალტუბოს აღორძინების პროექტი არის მისი კიდევ ერთი დიდი საქველმოქმედო ინვესტიცია, რომელიც წყალტუბოს თავის ფუნქციას დაუბრუნებს და საერთაშორისო კურორტის სტატუსს შესძენს... ეს არის უნიკალური პროექტი, რომლის განხორციელებაც მრავალი წლის განმავლობაში ვერ შეძლო ვერც სახელმწიფომ და ვერც კერძო სექტორმა".

ინფრასტრუქტურის მინისტრმა, მაია ცქიტიშვილმა ბიძინა ივანიშვილს "სახელმწიფოებრივად მოაზროვნე ქველმოქმედი" უწოდა, რომელსაც "რეგიონის შეცვლა შეუძლია".

"ათეული წლების განმავლობაში წყალტუბომ ვერ დაიბრუნა ის ფუნქცია, რაც ჰქონდა. ბატონი ბიძინას ინიციატივის შედეგად, წყალტუბოსთვის მისი პოტენციალის სრულად ათვისება რეალისტური გახდა. ეს არის მაგალითი იმისა, თუ როგორ შეიძლება ქველმოქმედმა ამასთან ერთად სახელმწიფოებრივად მოაზროვნე ქველმოქმედმა შეცვალოს მთელი რეგიონი", — ამბობს მაია ცქიტიშვილი ჟურნალისტებთან საუბრისას.