თურქეთის პრეზიდენტი, რეჯეპ ტაიპ ერდოღანი და რუსეთის პრეზიდენტი, ვლადიმერ პუტინი შეთანხმდნენ, რომ სირია-თურქეთის საზღვარს ერთობლივად გააკონტროლებენ. სირიაში მიმდინარე მოვლენებზე პრეზიდენტებმა 22 ოქტომბერს სოჭში ისაუბრეს. მოლაპარაკებები ექვს საათს გაგრძელდა.

მოლაპარაკების ფარგლებში პუტინმა და ერდოღანმა ათპუნქტიან მემორანდუმს მოაწერეს ხელი. შეთანხმების თანახმად, თურქეთი 30-კილომეტრიანი ზონის იმ ნაწილს გააკონტროლებს, რომელზე კონტროლიც მან სამხედრო ინტერვენციის დროს დაამყარა. დანარჩენ ნაწილზე კი რუსეთის სამხედრო ძალები შევლენ, ხოლო ქურთულმა სამხედრო დანაყოფებმა ტერიტორია უნდა დატოვონ. მხოლოდ ამის შემდეგ დაიწყება რუსულ-თურქული საერთო პატრულირება.

პუტინის განცხადებით, მოლაპარაკებების ფარგლებში მხარეებმა შეძლეს, სიტუაციის ნორმალიზებისთვის ერთობლივი მიდგომა ეპოვათ. გარდა ამისა, ერდოღანმა აღნიშნა, რომ ე.წ. უსაფრთხო ზონაში შესაძლოა სირიელი ლტოლვილების ნაწილი დასახლდეს, რომელიც ახლა თურქეთში ცხოვრობს.

9 ოქტომბერს თურქეთმა სირიაში, სასაზღვრო ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მის მიზნად ქურთებისგან ტერიტორიის გათავისუფლებას ასახელებს.

ტერიტორიას, რომელზეც თურქეთს "უსაფრთხო ზონის" შექმნა სურს, სირიის დემოკრატიული ძალები (SDF) აკონტროლებს, რომლის შემადგენლობაში სახალხო თავდაცვის დანაყოფები (YPG) შედის.

სამხედრო ინტერვენცია მას შემდეგ დაიწყეს, რაც აშშ-მ ჯარების გაყვანის შესახებ განაცხადა. გადაწყვეტილება მოულოდნელი იყო, რადგან სირიელი ქურთები ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ.

თურქული ძალებისგან თავდასაცავად ქურთებმა დასახმარებლად სირიის სამთავრობო ძალებსა და რუსეთს მიმართეს. სირიამ თურქეთის სასაზღვრო ტერიტორიაზე ჯარების განთავსება დაიწყო, ხოლო რუსეთი თურქეთისა და სირიის სამხედრო ძალებს შორის პატრულირებს.

17 ოქტომბერს ანკარაში საგანგებო შეხვედრა გაიმართა. თურქეთის პრეზიდენტი, რეჯეპ ტაიპ ერდოღანი და აშშ-ს ვიცე-პრეზიდენტი, მაიკ პენსი შეთანხმდნენ, რომ თურქეთი 120 საათით ცეცხლს შეწყვეტდა, რა დროსაც ქურთები სირიის სასაზღვრო რეგიონიდან მებრძოლებსა და ტექნიკას გაიყვანდნენ.

ამავე თემაზე: