სახელმწიფო უსაფრთხოების სამსახურის ხელმძღვანელი, გრიგოლ ლილუაშვილი ამბობს, რომ სირიის ჩრდილოეთით განვითარებული მოვლენები ეროვნული უსაფრთხოების პოტენციურ საფრთხეს წარმოადგენს. ამის შესახემ ლილუაშვილმა გადაცემა SWOT ანალიზში ისაუბრა.

"საბრძოლო მოქმედებები ხორციელდება ჩვენი საზღვრიდან 1 000-1 500 კილომეტრის დაშორებით. რეგიონში მიმდინარე დიდ არეულობას ყველა ვარიანტში შეუძლია ზეგმოქმედება მოახდინეს ქვეყნის როგორც ეკონომიკურ განვითარებაზე, ისე სხვა პროცესებზე", — განაცხადა ლილუაშვილმა.

მისივე თქმით, არსებობს საფრთხე, რომ ქურთულ ციხეებში დატყევებული მერძოლები ისევ ე.წ. ისლამური სახელმწიფოს რიგებში აღმოჩნდნენ. გარდა ამისა, ლილუაშვილი ამბობს, რომ შესაძლოა, საქართველოს სატრანზიტო ქვეყნად გამოყენების საფრთხეც გაჩნდეს:

"პრობლემას აღრმავებს ისიც, რომ პოტენციური მებრძოლები შეიძლება, იყვნენ ევროკავშირის ქვეყნების წარმომადგენლებიც, ევროპული პასპორტებით ხელში. ამ ქვეყნებთან ჩვენ გვაქვს ძალიან ლიბერალური პოლიტიკა, უვიზო მიმოსვლა, შესაბამისად ამ ნაკადშიც კი ძალიან დიდი სამუშაო გვაქვს, რათა გამოვხშიროთ".

9 ოქტომბერს თურქეთმა სირიაში, სასაზღვრო ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მის მიზნად ქურთებისგან ტერიტორიის გათავისუფლებას ასახელებს.

ტერიტორიას, რომელზეც თურქეთს "უსაფრთხო ზონის" შექმნა სურს, სირიის დემოკრატიული ძალები (SDF) აკონტროლებს, რომლის შემადგენლობაში სახალხო თავდაცვის დანაყოფები (YPG) შედის.

სამხედრო ინტერვენცია მას შემდეგ დაიწყეს, რაც აშშ-მ ჯარების გაყვანის შესახებ განაცხადა. გადაწყვეტილება მოულოდნელი იყო, რადგან სირიელი ქურთები ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ.

თურქული ძალებისგან თავდასაცავად ქურთებმა დასახმარებლად სირიის სამთავრობო ძალებსა და რუსეთს მიმართეს. სირიამ თურქეთის სასაზღვრო ტერიტორიაზე ჯარების განთავსება დაიწყო, ხოლო რუსეთი თურქეთისა და სირიის სამხედრო ძალებს შორის პატრულირებს.

17 ოქტომბერს ანკარაში საგანგებო შეხვედრა გაიმართა. თურქეთის პრეზიდენტი, რეჯეპ ტაიპ ერდოღანი და აშშ-ს ვიცე-პრეზიდენტი, მაიკ პენსი შეთანხმდნენ, რომ თურქეთი 120 საათით ცეცხლს შეწყვეტდა, რა დროსაც ქურთები სირიის სასაზღვრო რეგიონიდან მებრძოლებსა და ტექნიკას გაიყვანდნენ.

ამავე თემაზე: