ტელეკომპანია რუსთავი 2-ის 60-პროცენტიან წილთან ერთად ორივე შენობაც დაყადაღებულია. ქონებაზე ყადაღა ფიქსირდება 15 ოქტომბრის ამონაწერში.

არხის შენობებს ყადაღა თბილისის საქალაქო სასამართლოს 3 ოქტომბრის განჩინებით დაედო, წილებს კი, როგორც დვალი-აქიმიძის ადვოკატი ამბობს, დღევანდელი, 21 ოქტომბრის განჩინებით. ქონებაზე ყადაღის დამდები პირი მითითებული არ არის.

რუსთავი 2-ის გენერალური დირექტორი, პაატა სალია On.ge-ს სატელეფონო ზარებს არ პასუხობს, ყოფილი გენერალური დირექტორი, ნიკა გვარამია კი აცხადებს, რომ ყადაღა არხს ევროპის მაუწყებელთა ასოციაციის მოთხოვნით დაედო.

"ამ გაერთიანების უზარმაზარი ვალი დამხვდა რ2-ში მისულს... ნელნელა ვიხდიდით, თუმცა ქიბარის ყადაღის და ფინანსური პრობლემების გამწვავების შემდეგ მოლაპარაკების შემდეგი რაუნდი დაგვჭირდა გადავადებისთვის... ხოდა, მივიღეთ საქართველოს ისტორიაში უპრეცედენტო ამბავი — EBU-მ ყადაღა დაადო არხის ქონებას", — წერს გვარამია Facebook-ზე.