ქართულს ოცნებას რეალური შანსი აქვს, პარლამენტში მოიპოვოს საკონსტიტუციო უმრავლესობა. ამისთვის მას 113 მანდატი სჭირდება, 67 კი უკვე გარანტირებულად აქვს. მეორე ტური იმართება 50 საარჩევნო ოლქში, სადაც სწორედ მმართველი გუნდის კანდიდატები არიან გადასული.

თუ რა გავლენა შეიძლება მოახდინოს მმართველი გუნდის მიერ საკონსტიტუციო უმრავლესობის მოპოვებამ, On.ge კონსტიტუციონალისტ ვახუშტი მენაბდეს ესაუბრა:

რის უფლებას მისცემს საკონსტიტუციო უმრავლესობა ქართულ ოცნებას?

კონსტიტუციური უმრავლესობა ქართულ ოცნებას მისცემს ყველა გადაწყვეტილების მიღების უფლებას, რომელიც შეიძლება კონსტიტუციით გაფორმდეს. საკონსტიტუციო უმრავლესობა არის ყველაზე მაღალი უმრავლესობა. მას შეუძლია კონსტიტუცია შეცვალოს, რა თქმა უნდა შეუძლია ყველა კანონი მიიღოს, შეუძლია მთავრობის დაკომპლექტება, უნდობლობის გამოცხადება, იმპიჩმენტის გაკეთება საკონსტიტუციო სასამართლოს დასტურის შემთხვევაში, (უმაღლესი თანამდებობის პირების პასუხისგებაში მიცემის, კონსტიტუციის დარღვევისა და დანაშაულის ჩადენის ბრალდებით მათი საქმეების პარლამენტში სასამართლო განხილვის განსაკუთრებული წესი.) ნებისმიერი თანამდებობის პირის, რომელსაც თავად პარლამენტი ირჩევს, თანამდებობაზე განმწესება, ანუ ყველა ეს უფლებამოსილება რომელიც პარლამენტს გააჩნია, შეიძლება საკონსტიტუციო უმრავლესობით იქნას მიღებული.

რა ცვლილებებია მოსალოდნელი კონსტიტუციაში?

ამჟამად რაც დაანონსებულია, რაც ინიცირებულია, ცხადია ჩნდება მოლოდინი მათი განხილვის. მაგალითად, როგორც არის ქუთაისიდან პარლამენტის თბილისში გადმოტანა, ასევე ერთნაირსქესიანთა ქორწინების შესახებ კანონპროექტი და კონსტიტუციური ცვლილებები, რომლებიც უფრო მეტად საპარლამენტო რესპუბლიკისკენ წაგვიყვანს. ლოგიკური მოლოდინია ამ საკითხების განხილვისა და გააქტუალურების.

რა აჩვენა ძველმა გამოცდილებამ,როდესაც წინა მთავრობებმაც მოიპოვეს საკონსტიტუციო უმრავლესობა?

ძველი გამოცდილება გვაჩვენებს, რომ საკონსტიტუციო უმრავლესობის პირობებში ძალიან რთული ხდება უმრავლესობის ძალაუფლების დაბალანსება და შეკავება, რომელიც გააჩნია მმართველ გუნდს. მეორე მხრივ, როგორც წესი, ძალიან უჭირს მმართველ გუნდს გაუძლოს ცდუნებას და ბოლოს ეს ძალაუფლების ზომაზე მეტ კონსოლიდირებაში გამოიხატება. საბოლოო ჯამში კი ეს ადამიანის უფლებებზე და დემოკრატიულ პროცესებზე უარყოფითად აისახება. საკონსტიტუციო ცვლილებებზე ბატონმა კობახიძემ განაცხადა, რომ ისინი არ აპირებენ ერთპიროვნულად მიიღონ გადაწყვეტილება და ვიმედოვნებ, რომ ბოლო მომენტში ისინი ამ სიტყვას არ გადავლენ და კონსტიტუციაში ცვლილებებს ისე არ შეიტანენ თუ არა კონსენსუსით.

რა გავლენას მოახდენს ქვეყნის შიდა პოლიტიკურ პროცესებზე?

პირველ რიგში, კიდევ უფრო გაიზრდება ხელისუფლების სხვა შტოების მნიშვნელობა, განსაკუთრებით საკონსტიტუციო სასამართლოსი, იმისთვის რომ შეაკავოს უმრავლესობის ძალა. ძალიან მნიშვნელოვანი იქნება ადგილობრივი თვითმმართველობის არჩევნების შედეგები, რომელიც მომავალ წელს გაიმართება. ცხადია, ერთიორად იზრდება მედიისა და სამოქალაქო კონტროლის მექანიზმების როლი, ვინაიდან პარლამენტის შიგნით ძალიან შესუსტდება უმცირესობის ინსტრუმენტები, რომელსაც ისინი იყენებენ უმრავლესობის ძალაუფლების დასაბალანსებლად. პარლამენტგარე არაფორმალურ მექანიზმებს უფრო მეტი გარჯა მოუწევთ იმისთვის, რომ პოზიტიური გავლენა მოახდინონ დემოკრატიულ პროცესებზე.