ამერიკის შეერთებული შტატების 2020 ფისკალური წლის კანონპროექტის თანახმად, გამოყოფილი დაფინანსებით ვერ ისარგებლებს ვერცერთი ქვეყნის ცენტრალური მთავრობა, თუ დაადგენენ, რომ მათ აღიარეს რუსეთის მიერ ოკუპირებული აფხაზეთისა და ცხინვალის რეგიონის დამოუკიდებლობა, ან მათთან დაამყარა დიპლომატიური ურთიერთობები. ასეთივე ჩანაწერი პირველად 2017 წელს გაკეთდა.

კანონით, გამოყოფილი რაიმე დაფინანსება არ შეიძლება გამოიყენონ რუსეთის მიერ აფხაზეთისა და ცხინვალის რეგიონის ოკუპაციის მხარდასაჭერად.

კანონპროექტის ავტორები მოუწოდებენ აშშ-ის ხაზინის დეპარტამენტს, რათა მათ მხარი არ დაუჭირონ ნებისმიერი იმ პროგრამის დაფინანსებას (სესხის, კრედიტისა და გარანტიის ჩათვლით), რომელიც არღვევს საქართველოს სუვერენიტეტსა და ტერიტორიულ მთლიანობას.

2020 წლის კანონპროექტში საქართველოსთვის განკუთვნილი თანხა 132 025 000 დოლარს შეადგენს. საქართველოს საგარეო საქმეთა სამინისტროს განცხადებით, ეს რიცხვი საქართველოსა და აშშ-ის ურთიერთობების მანძილზე ყველაზე მაღალი ნიშნულია. მათივე ცნობით, საქართველომ მიიღო 40-მილიონიანი დაფინანსება საგარეო სამხედრო დაფინასების ფონდის (FMF) ფარგლებში (5 მლნ აშშ დოლარით მეტი, ვიდრე შარშან).

კანონპროექტი ითვალისწინებს $285 მლნ-ის გამოყოფას ევროპისა და ევრაზიის ქვეყნებისთვის, მათ შორის, საქართველოსთვის, დასავლური ინტეგრაციის მხარდასაჭერად.

კანონპროექტის თანახმად, დაფინანსების ნაწილი უნდა მოხმარდეს აღმოსავლეთ პარტნიორობის ქვეყნების მიერ ევროკავშირთან გაფორმებული ასოცირების შესახებ შეთანხმებებისა და სავაჭრო შეთანხმებების შესრულებას, ისევე როგორც საგარეო ეკონომიკური ფაქტორების ზეგავლენისა და რუსეთის ფედერაციის მხრიდან პოლიტიკური და ეკონომიკური ზეწოლის შემცირებას.