შინაგან საქმეთა სამინისტროს ინფორმაციით, ცეცხლსასროლი იარაღისა და საბრძოლო მასალის უკანონო შეძენა-შენახვის ბრალდებით თბილისში ერთი პირი დააკავეს. უწყების განმარტებით, ბრალდებულის ბინიდან გადაჭრილი სანადირო თოფი, კალაშნიკოვის სისტემის "აკმ" მოდელის ავტომატური ცეცხლსასროლი იარაღი და 30 საბრძოლო ვაზნა ამოიღეს.

მათი თქმით, დაკავებული ჩადენილ დანაშაულს აღიარებს. საქმეზე გამოძიება საქართველოს სისხლის სამართლის კოდექსის 236-ე მუხლის მე-3 ნაწილით მიმდინარეობს, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს. ამ მუხლით გათვალისწინებული დანაშაული 3-დან 6 წლამდე ვადით თავისუფლების აღკვეთას ითვალისწინებს.