"ის, რაც იმ დღეს მოხდა, იყო უფრო რუსული ჩარევის სტილი და არა ქართული სტუმართმოყვარეობა", — ასე შეაფასა ყოფილმა ამერიკელმა მაღალჩინოსანმა, დევიდ კრამერმა 10 სექტემბერს კონფერენციაზე განვითარებული მოვლენები. ამის შესახებ კრამერმა #სირცხვილიას გადაცემაში ისაუბრა.

მისი თქმით, დეპუტატ ირმა ინაშვილს შეეძლო კონფერენციაზე დასწრება და ამისთვის მას უბრალოდ რეგისტრაცია უნდა გაევლო. კრამერის განმარტებით, კონფერენციაზე განვითარებულ მოვლენებს სიტყვის თავისუფლებასთან კავშირი არ აქვს.

"ადამიანები, რომლებსაც არ ვიცნობ უხეშად შემოვიდნენ და კონფერენციის ჩაშლა სცადეს. თავიდან დაიწყო მიკროფონიანი ადამიანით. სანამ მისკენ მქონდა ყურადღება გადატანილი, შემოვიდა ქალბატონი და წინა რიგში დადგა. კამერებიანი ადამიანები მის ირგვლივ მოგროვდა. მე ველოდებოდი სიტუაციის დამშვიდებას, მაგრამ ასე არ მოხდა. გადავწყვიტე მივსულიყავი ამ არეულობის ეპიცენტრში და მომეშორებინა ეს კამერები. არ ვიცოდი ვინ იყო ეს ქალბატონი და არც ვიცოდი ვინ იყო ეს მიკროფონიანი ბიჭი" — აღნიშნა კრამერმა.

10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე ირმა ინაშვილის დაუპატიჟებლად მისვლას ხმაური და დაპირისპირება მოჰყვა. კონფერენციის ორგანიზატორებმა ინაშვილს განუმარტეს, რომ ის არ იყო სიაში, შესაბამისად, კონფერენცია უნდა დაეტოვებინა. კონფერენციის დატოვებისკენ მოუწოდა აშშ-ის სახელმწიფო მდივნის ყოფილმა თანაშემწემ, დევიდ კრამერმაც. ინაშვილმა თქვა, რომ წინა დღეს ამავე კონფერენციაზე დეპუტატმა გიგა ბოკერიამ მისი მისამართით ცილისმწამებლური განცხადება გააკეთა და ის პასუხის გასაცემად მივიდა. სტუმრების ნაწილმა აღნიშნა, რომ ირმა ინაშვილის ქმედება მიუღებელი იყო.

დაპირისპირების შემდეგ ირმა ინაშვილი სიტყვით მაინც გამოვიდა. როგორც მან განაცხადა, მისი პარტია პროდასავლური აზროვნებისაა. გარდა ამისა, მან დევიდ კრამერისგან ბოდიშის მოხდაც მოითხოვა.

ირმა ინაშვილმა პრესკონფერენციაზე განაცხადა, რომ კრამერის სიას მოამზადებს, რომელსაც პარლამენტს წარუდგენს. მისივე თქმით, ამავე სიაში შევა მეთიუ ბრაიზა, რომელიც ამერიკელი დიპლომატი და სახელმწიფო დეპარტამენტის ყოფილი მაღალჩინოსანია.

თავის მხრივ მეთიუ ბრაიზამ განაცხადა, რომ პატრიოტთა ალიანსის დეპუტატმა ირმა ინაშვილმა ბოდიში თავად უნდა მოიხადოს:

"ამ ქალმა ფიზიკური შეურაცხყოფა მიაყენა ნინო ევგენიძეს. ჩემს ქვეყანაში ამის გამო ის ციხეში მოხვდებოდა. ის მას აჯანჯღარებდა და ფხაჭნიდა", — ამბობს მეთიუ ბრაიზა ტელეკომპანია მთავარი არხის თარგმანის მიხედვით.

მეთიუ ბრაიზას განცხადებას ირმა ინაშვილი სიცრუეს უწოდებს და ცილისწამებაში ადანაშაულებს. პატრიოტთა ალიანსმა მეთიუ ბრაიზასა და დევიდ კრამერს პროკურატურაში უჩივლა.