ნატოს საპარლამენტო ასამბლეის პრეზიდენტი მედლინ მუნი საოკუპაციო ხაზთან სოფელ ხურვალეთში იმყოფებოდა. მუნმა გაიცნო მავთულხლართებს მიღმა მცხოვრები დავით ვანიშვილი, რომელიც საზოგადოებისთვის დათა პაპად არის ცნობილი.

დათა პაპამ მუნს ოკუპაციაში ცხოვრებასა და რუსი სამხედროების მუქარებზე უამბო. კითხვაზე, რა არის მთავარი, რაც პაპას სურს, რომ ნატოს ასამბლეის პრეზიდენტმა იცოდეს, ის პასუხობს, რომ საქართველოს კონტროლირებად ტერიტორიაზე დარჩენილი მიწების დამუშავების უფლებას არ აძლევენ.

პირველი არხის ინფორმაციით, დათა პაპასთან საუბრის შემდეგ მუნმა საოკუპაციო რეჟიმს არაადამიანური უწოდა და აღნიშნა, რომ ამ პრობლემებს ფართო საზოგადოებას აცნობებს.

"მნიშვნელოვანია, რომ ჩვენ თავად მოვისმინეთ ამ ადამიანის საუბარი და მადლობას ვუხდით სიმამაცისთვის, რომ მოვიდა და აგვიხსნა ყველაფერი, ის სირთულეები, რის წინაშეც დგას, რა ულმობელი და არაადამიანური პირობებია აქ, სადაც ადამიანებს საკუთარი მიწები ჩამოართვეს...

მე გპირდებით, ჩვენ არ დავწერთ მხოლოდ ანგარიშს და ეს იქ არ დამთავრდება, არამედ გავაკეთებთ ყველაფერს, რაც შეგვიძლია, რომ აქ მიმდინარე პროცესები უფრო ფართო საზოგადოებისთვის გახდეს გასაგები. ეს პრობლემა, სირთულეები და სისასტიკე, ეს ყველაფერი არ არის მთავრობებს შორის, არამედ ის ადამიანები აწყდებიან, რომლებიც პატიოსნად, მშვიდად ცხოვრობენ", — განაცხადა მან.

გაიგეთ მეტი: