რეალითი შოუს ვარსკვლავმა და ბიზნესმენმა კიმ კარდაშიანმა 64 წლის ქალი სხეულის მაკორექტირებელი საცვლების რეკლამაში გადაიღო. ელის მარია ჯონსონს ნარკო-ტრეფიკინგის ორგანიზაციის საქმეებში მონაწილეობის გამო სამუდამო პატიმრობა ჰქონდა მისჯილი, თუმცა მისი დანაშაული არაძალადობრივი იყო.

1996 წელს დაპატიმრებული ჯონსონი 2018 წლის ივნისში ამერიკის პრეზიდენტმა დონალდ ტრამპმა კარდაშიანთან აუდიენციის შემდეგ შეიწყალა.

კიმ კარდაშიანი 10 სექტემბერს სხეულის მაკორექტირებელი საცვლების ხაზს, Skims-ს უშვებს. ერთ-ერთ სარეკლამო რგოლში კი ელის მარია ჯონსონი მონაწილეობს.

"საუკეთესო მოდელი", — დაწერა კარდაშიანმა ტვიტერზე.

მომხმარებლების ნაწილი კიმს აკრიტიკებს და ამბობს, რომ ის იმ ქალს იყენებს საკუთარი ბიზნესის რეკლამაში, რომელსაც ციხიდან გათავისუფლებაში დაეხმარა, ნაწილი კი ამბობს, რომ კრიტიკა უსაფუძვლოა და ამ კამპანიაში მონაწილეობით თავად ჯონსონიც მოგებული რჩება.

"კიმ კარდაშიანმა ჩემი ისტორია გაიგო და თქვა, რომ უსამართლოდ მექცეოდნენ. მე შეწყალების შეტანის უფლებაც კი არ მქონდა და მან ჩემი თავისუფლებისთვის იბრძოლა, მე კი ისიც არ ვიცოდი, თუ ვინ იყო კიმ კარდაშიანი", — ამბობს ჯონსონი რეკლამაში. ვიდეო რგოლის ბოლოს კი დასძენს, რომ სარეკლამო პროდუქტი მას თავისუფლებას ანიჭებს.

2019 წლის დასაწყისში კიმ კარდაშიანი არაძალადობრივი, ნარკოდანაშაულის გამო დაკავებული 17 ადამიანის შეწყალებაში მონაწილეობდა.

კარდაშიანის პირადმა იურისტმა და Buried Alive Project-ის დამფუძნებელმა ბრიტანი ბარნეტმა მაშინ თქვა, რომ ამ პატიმრების გათავისუფლებაში კარდაშიანის როლი გადამწყვეტი იყო:

"კიმი ამ პროექტს აფინანსებს და ის ჩვენი კამპანიის 90 Days of Freedom [თავისუფლების 90 დღე] უმნიშვნელოვანესი მხარდამჭერია. ამ კამპანიის ნაწილში, დონალდ ტრამპმა მასთან შეხვედრისას მოაწერა ხელი პირველი ნაბიჯის აქტს. ჩვენ მთელი ქვეყნის მასშტაბით დავდივართ სასამართლოებში და მოსამართლეებისგან ამ პატიმრების გათავისუფლებას ვითხოვთ".

კიმ კარდაშიანმა აპრილში, ვოგთან ინტერვიუში თქვა, რომ აპირებს იურისტი გახდეს. ამისთვის ის სხვადასხვა კურსებს გადის.

ახალ, სხეულის მაკორექტირებელი საცვლების ბრენდს კარდაშიანმა თავდაპირველად Kimono დაარქვა, რასაც უარყოფითი გამოხმაურება მოჰყვა, რადგან კიმონო ჰქვია იაპონიის ტრადიციულ სამოსსაც. მას შემდეგ, რაც იაპონიელმა პოლიტიკოსებმა კარდაშიანი კულტურულ მიუღებლობაში დაადანაშაულეს, მან ბრენდს სახელი შეუცვალა და Skims დაარქვა.