ქართული ოცნების წევრი, გია ჟორჟოლიანისთვის 20 ივნისის "გავრილოვის ღამე" პარლამენტის შტურმით აღების ღამეა. მან ამის შესახებ პარლამენტის პლენარულ სხდომაზე ისაუბრა და აღნიშნა, რომ ყველაფერს თავისის სახელი უნდა დაერქვას.

"სიტყვებს აქვთ მნიშვნელობა და თუ ჩვენ ამას წავუყრუებთ საზოგადოებაში დამკვიდრდება, ვითომ გავრილოვი არის საქართველოს ისტორიისათვის მნიშვნელოვანი ფიგურა ან ის ამბავი იყო მთავარი. არა, მთავარი იყო პარლამენტის შტურმი და ეს იყო პარლამენტის შტურმის ღამე", — აღნიშნა უმრავლესობის წევრმა.

გია ჟორჟოლიანმა ჟურნალისტებს, საზოგადოებასა და მედიას მოუწოდა არ გამოიყენონ ეს სიტყვები. მისი განმარტებით, ეს სიტყვები ნაციონალური მოძრობის პიარის ნაწილია და მოვლენებს იმ რაკურსით აჩვენებს, რაც ერთ ჯგუფს აწყობს.

20 ივნისის აქცია და "გავრილოვის ღამე" დღეს, 3 სექტემბერს, ისევ აქტუალური გახდა. შს მინისტრი გიორგი გახარია უმრავლესობამ პრემიერ-მინისტრობის კანდიდატად დაასახელა. მინისტრის, გადადგომას საზოგადოების ნაწილი 76 დღეა ითხოვს. რამდენიმე თვის წინ შინაგან საქმეთა მინისტრი გახარია ამტკიცებდა, რომ პრემიერობა არ სურს. ასევე, ამბობდა, რომ 20 ივნისის საქმის გამოძიებას ბოლომდე მიიყვანდა, ამიტომ გადადგომას არ აპირებდა, თუმცა დღეიდან შინაგან საქმეთა მინისტრი აღარ არის.

20 ივნისის აქცია

19-22 ივნისს ზაქარია ქუცნაშვილის ორგანიზებით თბილისში მართლმადიდებლობის საპარლამენტთაშორისო ასამბლეა უნდა გამართულიყო, რომლის ფარგლებში რუსი დეპუტატები საქართველოში ჩამოვიდნენ. 20 ივნისს ორგანიზაციის პრეზიდენტი, რუსი დეპუტატი სერგეი გავრილოვი ასამბლეის სესიის წაყვანისთვის პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". ოპოზიციის პროტესტის შემდეგ ასამბლეა შეწყდა, ხოლო ზაქარია ქუცნაშვილმა განაცხადა, რომ დეპუტატის მანდატს დატოვებდა.

გავრილოვის მიერ სკამის დაკავებას საპროტესტო ტალღა მოჰყვა სამოქალაქო სექტორშიც. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

20 ივნისის აქციის დაშლა ხელისუფლებამ გაფრთხილების გარეშე დაიწყო. ამ პროცესში დაშავდა მინიმუმ 240 ადამიანი, 30-ზე მეტი ჟურნალისტი. ორ ადამიანს ამოაჭრეს თვალი. სპეცრაზმის თანამშრომლები დამიზნებით ესროდნენ მოქალაქეებს. ამ საქმეზე შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა.