აშშ-ს სახელმწიფო დეპარტამენტი ჩორჩანაში მიმდინარე მოვლენებს გამოეხმაურა და მხარეებს ესკალაციის თავიდან აცილებისკენ მოუწოდებს. როგორც დეპარტამენტის წარმომადგენელმა, მორგან ორტაგუსმა აღნიშნა, დეპარტამენტი მოუწოდებს მხარეებს, რომ სიტუაციის გადასაჭრელად გამოიყენონ ევროპის მონიტორინგის მისიის ცხელი ხაზი და იმოქმედონ ჟენევის საერთაშორისო დისკუსიების თანათავმჯდომარეებთან ერთად.

ამასთანავე, აშშ მოუწოდებს რუსეთს, რომ ადმინისტრაციული საზღვრის მახლობლად ესკალაციის თავიდან ასაცილებლად ყველა არხი გამოიყენოს.

გუშინ, 29 აგვისტოს სოფელ ერგნეთში ინციდენტების პრევენციისა და მათზე რეაგირების მექანიზმის შეხვედრა ჩაიშალა. დე-ფაქტო რეჟიმის წარმომადგენელმა, ეგორ კოჩიევმა განაცხადა, რომ მათ ქართული მხარისგან სოფელ ჩორჩანას საგუშაგოს აღება და "პროვოკაციების შეწყვეტა მოითხოვეს". შეხვედრა კი "ქართული მხარის მიერ კონსტრუქციულ დიალოგზე არწასვლის" გამო დატოვეს.

ოსურმა მხარემ საქართველოს ცენტრალურ ხელისუფლებას ულტიმატუმი წაუყენა და სოფელ წნელისთან განთავსებული საგუშაგოს ასაღებად დრო პარასკევს, დილის 6 საათამდე მისცა. ეს ულტიმატუმი ქართულმა მხარემ არ შეასრულა.

ეროვნული უსაფრთხოების საბჭოს აპარატის უფროსი, კახაბერ ქემოკლიძე ამბობს, რომ ოსური მხარისგან ულტიმატუმის პათოსით საუბარი [საგუშაგოს დაშლაზე] გაუგებარი და "კატეგორიულად მიუღებელია". მისივე თქმით, ხაშურის მუნიციპალიტეტის სოფელ ჩორჩანასთან არსებული ტერიტორია 2008 წლის ომამდეც და მის შემდეგაც მიიჩნეოდა ცენტრალური ხელისუფლების მიერ კონტროლირებად ტერიტორიად.

ამის შემდეგ ცხინვალის ინიციატივით ტექნიკური შეხვედრა გაიმართა. უსაფრთხოების საბჭოს აპარატის უფროსის, კახა ქემოკლიძის თქმით, შეხვედრაზე დე ფაქტო ცხინვალის მხარემ თქვა, რომ ულტიმატუმის ენით საუბარი მათი განზრახვა არასდროს ყოფილა. ამის შესახებ მან სოფელ ჩორჩანასთან განაცხადა, სადაც შეხვედრა დასრულდა.

მისივე განცხადებით, საგუშაგოს ადგილმდებარეობის შეცვლის საკითხი შეხვედრაზე არ განხილულა. ქემოკლიძემ აღნიშნა, რომ მოცემულ მომენტში, საგუშაგო თავის ადგილას რჩება. შეხვედრაზე მხარეები შეთანხმდნენ, რომ შემდეგ კვირაში კიდევ ერთი ტექნიკური შეხვედრა გაიმართება.

საოკუპაციო რეჟიმის ულტიმატუმის შეუსრულებლობის შემდეგ ოსური მხარე ოკუპირებულ სოფელ წნელისში საგუშაგოს აშენებას აპირებს. როგორც დე ფაქტო პრეზიდენტმა, ანატოლი ბიბილოვმა განაცხადა, მათი მოთხოვნა უცვლელია.