ბრიტანული გამოცემა The Guardian-ის ინფორმაციით, აშშ-ს პრეზიდენტის, დონალდ ტრამპის შემოთავაზებამ დიდი შვიდეულის ფორმატში რუსეთის დაბრუნების შესახებ კამათი გამოიწვია. როგორც გამოცემა წერს, ტრამპმა თავისი მოსაზრება 24 აგვისტოს ლიდერების ვახშმის დროს გამოთქვა და კოლეგების ყველა არგუმენტს უარყოფდა.

ტრამპი ამტკიცებდა, რომ ირანის, სირიისა და ჩრდილოეთ კორეის საკითხზე საუბრისას რუსეთის მონაწილეობა აუცილებელია. აშშ-ს პრეზიდენტის იდეას მხარი დაუჭირა იტალიის პრემიერ-მინისტრმა ჯუზეპე კონტემ, ხოლო იაპონიის პრემიერმა ნეიტრალიტეტი დაიკავა. სხვა ლიდერები კი კატეგორიულ უარზე იყვნენ.

დიდი შვიდეულის სამიტი წელს საფრანგეთში, ქალაქ ბიარიცში მიმდინარეობს. აშშ-ს პრეზიდენტმა, დონალდ ტრამპმა წინა წლების მსგავსად დიდი რვიანის სამიტის ფარგლებში რუსეთის დაბრუნება ისურვა. აღნიშნულ შემოთავაზებას ნაადრევი უწოდეს საფრანგეთმა და გერმანიამ. ამასთანავე, უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთს გაერთიანებაში დაბრუნება მხოლოდ ყირიმის ანექსიის შეწყვეტის შემდეგ შეუძლია.

1997 წლიდან რუსეთი დიდი რვიანის სამიტებში აქტიურად იღებდა მონაწილეობას, თუმცა 2014 წელს ყირიმის ანექსიის გამო რუსეთი რვიანიდან გარიცხეს. ამის შემდეგ დიდი რვიანი დიდ შვიდეულად გადაკეთდა.

რამდენიმე დღის წინ რუსეთის პრეზიდენტმა, ვლადიმერ პუტინმა საფრანგეთის პრეზიდენტთან, ემანუელ მაკრონთან შეხვედრისას განაცხადა, რომ დიდი რვიანი აღარ არსებობს, ახლა არის მხოლოდ შვიდეული და რუსეთი მზადაა მასთან ითანამშროლოს. თვითონ მაკრონმა აღნიშნა, რომ დიდი რვიანის მუშაობის აღდგენა უკრაინის კრიზის დარეგულირებას უკავშირდება.