რუსთავი 2-ის ყოფილი ტელეწამყვანი, გიორგი გაბუნია ამბობს, რომ ვლადიმერ პუტინის გინების შემდეგ არხის ამჟამინდელ ხელმძღვანელს, ქიბარ ხალვაშს არ სურდა, რომ ის ეთერში გასულიყო. როგორც მან #სირცხვილიას გადაცემაში თქვა, ამის შესახებ მან რუსთავი 2-ის დირექტორი, პაატა სალია ესაუბრა.

"ის [ქიბარ ხალვაში] თვლიდა და დარწმუნებული იყო, რომ ეს ტექსტი მომიმზადა ნიკა გვარამიამ და ნიკა გვარამიას მიხეილ სააკაშვილმა. თითქოს, მე ვარ პირდაპირ დაკავშირებული მიხეილ სააკაშვილთან და ეს იყო მის მიერ დაგეგმილი პროვოკაცია, რომელიც მე განვახორციელე", — აღნიშნა ჟურნალისტმა.

მისივე თქმით, გინების ტექსტის შესახებ არავინ იცოდა და გადაცემამდე მხოლოდ რამდენიმე წუთით ადრე გამოაჩინა. გარდა ამისა, გაბუნია ამბობს, რომ პუტინის გინება შეცდომად არ მიაჩნია და ამის გამო ბოდიშის მოხდას არ აპირებს.

კურიერის წამყვანებმა, დიანა ჯოჯუამ და მიშა სესიაშვილმა ტელეკომპანია პირდაპირ ეთერში დატოვეს. ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.