რუსთავი 2-ის ყოფილი ტელეწამყვანი გიორგიო გაბუნია ამბობს, რომ რუსეთის პრეზიდენტის, ვლადიმერ პუტინის მიმართ გინება შეცდომა არ იყო და ამის გამო ბოდიშის მოხდას არ აპირებს. ამის შესახებ მან პარლამენტის წინ, #სირცხვილიას გადაცემაში პირველად ისაუბრა.

"მე რომ ჩამეთვალა, რომ ეს შეცდომა იყო, მე ბოდიშს მოვიხდიდი. არ ვაპირებ ბოდიშის მოხდას პუტინის გინების გამო იმ ფორმითაც კი, რა ფორმითაც გავაკეთე. ვიცი, რომ ძალიან მტკივნეულია, განსაკუთრებით ბოლო ნაწილი, როდესაც მშობლები და მშობლების საფლავები ვახსენე, მაგრამ ამ მომენტში მახსენდება ის საფლავები, რომლებიც რუსმა ჯარისკაცებმა შეურაცხყვეს", — განაცხადა გაბუნიამ.

გიორგი გაბუნიამ გადაცემის ეთერში ვლადიმერ პუტინს რამდენიმე თვის წინ აგინა. ამ საკითხმა განსაკუთრებული ყურადღება მიიქცია მთავრობის პირველი პირებისა და ჰომოფობიური ჯგუფების მხრიდან. მთავრობა საერთაშორისო ორგანიზაციებს რეაგირებას, ჰომოფობიური ჯგუფები კი არხს ჟურნალისტის და დირექტორის გათავისუფლებას და გამოძიების დაწყებას სთხოვდნენ.

დღეს, 20 აგვისტოს ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი ნოდარ მელაძე. შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. ახალმა დირექტორმა, პაატა სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

გაიგეთ მეტი ჟურნალისტების გათავისუფლების მიზეზებზე: