სოფელ გუგუტიანთკარში ადგილობრივები შველას ითხოვენ. მოსახლეობა, რომელიც ოკუპაციის გამო საკუთარ სახლებსა და ხეხილის ბაღებს კარგავს, დიპლომატებს შეხვდა და სოფელში არსებულ მძიმე სოციალურ მდგომარეობაზე მიაწოდეს ინფორმაცია.

"მინდა, რომ ყველანი დავდგეთ ერთად, უშველოთ საქართველოს, არ დავკარგოთ საქართველო. ჩვენ მომავალს ისტორია შევუნახოთ საქართველოსი. მე არ გეხვეწებით არაფერს, მარტო იმას გთხოვთ, რომ საქართველო ქართველების ხელში იყოს, ერთად დგომით, თანადგომით, მიაწვდინეთ მსოფლიოს ხმა, ჩვენ რა სატანჯველში ვართ. მე ტყვედ ვიყავი აყვანილი, რუსული ჩექმა მომხვდა, საშინლად მაწამეს, მაგრამ სოფელი არ დამიტოვებია. არც ახლა არ დავტოვებ, მაგრამ შვილებს და შვილიშვილებს რა ვუთხრათ? თუ არ დავეხმარებით", — ავრცელებს ადგილობრივის კომენტარს რუსთავი 2.

On.ge იძულებულია დაეყრდნოს სხვა მედიის მიერ გავრცელებულ კადრებსა და კომენტარებს, რადგან შსს და სუს ონლაინმედიას გუგუტიანთკარში "უსაფრთხოების მოტივით" არ უშვებს.

გუგუტიანთკარში მიმდინარე უკანონო ბორდერიზაციის პროცესის გამო მოსახლეობა იძულებულია წლების წინ აშენებული სახლები აგურ-აგურ დაშალოს, რადგან მათი კერძო საკუთრება, ოკუპანტების კონტროლირებად ტერიტორიაზე მოხვდა.

"სულს ვღაფავთ... ნაბიჯი არ გაადადგა რუსულმა ჩექმამ, რომ არ გამსრისოს და ვეღარ ვითმენ, ეს ბოღმები მახრჩობს... სიკვდილი მინდა, მინდოდა დამეჯანჯღარებინა, ან მოვმკვდარიყავი, ესროლათ, იქნებ ამით საქართველო გადარჩეს",— ამბობს ერთ-ერთი ადგილობრივი.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.

ამავე თემაზე: