ოკუპირებული ცხინვალის რეგიონის დე ფაქტო პრეზიდენტის წარმომადგენელი პოსტკონფლიქტურ საკითხებში, მურატ ჯიოევი ბრალდებებს, გუგუტიანთკარში ღობის გავლებაზე, საქართველოს მთავრობის პიარკამპანიას უწოდებს, "რათა პრობლემა გამოიყენონ დასავლეთთან მსხვერპლის როლში წარმოსაჩენად". ამის შესახებ სააგენტო რეს წერს.

"სინამდვილეში ეს ბრალდებები რუსეთის მიმართ სრულუად უსაფუძვლოა და ემსახურება მხოლოდ იმას, რომ კიდევ ერთხელ ცუდად წარმოაჩინონ საერთაშორისო თანამეგობრობის თვალში რუსეთის ყოფნა სამხრეთ ოსეთში", — აცხადებს მურატ ჯიოევი და განმარტავს, რომ ოსი ე.წ. მესაზღვრეები ითვალისწინებენ ადგილობრივთა ინტერესებს და "ერთი მეტრითაც არ გადადიან ქართულ მხარეზე".

მისივე თქმით, სამუშაოებს ასრულებენ დე ფაქტო სამხრეთ ოსეთის ე.წ. მესაზღვრეები ხოლო, რუსები უზრუნველყოფენ მხოლოდ ე.წ. საზღვრის დაცვას.

"იქ, სადაც არ არის არანაირი მანიშნებელი, ხშირად ირღვევა საზღვარი, მათ შორის, საქონლის მიერ, რომლებიც პოლიტიკაში საერთოდ ვერ ერკვევიან. ქართული მხარე არასდროს არაფერს აკეთებს იმისთვის, რომ დაუბრუნოს საქონელი ოსეთის მოსახლეობას. საზღვრის დაუდგენლობით ადგილობრივები ზარალდებიან", — ამბობს ჯიოევი.

15 აგვისტოს გორის მუნიციპალიტეტის სოფელ გუგუტიანთკარში საოკუპაციო რეჟიმმა ე.წ. საზღვრის გავლების უკანონო პროცესი განაახლა. საქართველოს მოქალაქეების, რაზმაძეებისა და გუგუტიშვილების ნაკვეთებში რუსი სამხედროები ძელებს არჭობდნენ. ეს ოჯახები სწორედ ამ მიწის ნაკვეთებს ამუშავებდნენ და მოსავალი მოჰყავდათ. შესაძლოა, ოკუპირებულ ტერიტორიაზე მოხვდეს სოფლის მთავარი სარწყავი არხიც. შედეგად, ადგილობრივები წყლის გარეშე დარჩებიან. გორის საკრებულოს წარმომადგენელმა თქვა, რომ ამ საკითხზე რუს სამხედროებს ესაუბრა, რომლებმაც უთხრეს, რომ წყლის რეზერვუარს საქართველოს არაკონტროლირებად ტერიტორიაზე არ მოაქცევდნენ.

სახელმწიფო უსაფრთხოების სამსახურში On.ge-ს უთხრეს, რომ ორჯერ გაააქტიურეს ცხელი ხაზი, ინფორმირებულია ევროკავშირის სადამკვირვებლო მისია. ამავე სოფელში მავთულხლართების გაბმა დაიწყეს 7 აგვისტოსაც, მოგვიანებით კი სამუშაოები შეწყდა, ოთხი დღის შემდეგ კი ისევ განახლდა.

ამავე თემაზე: