საქართველოს პრეზიდენტმა, სალომე ზურაბიშვილმა დეპუტატობისა და შემდეგ პრეზიდენტის კამპანიის დროს აგვისტოს ომზე საუბრისას თქვა, რომ "საკუთარ თანამოქალაქეებს ცეცხლი საქართველოს ექსპრეზიდენტმა, მიხეილ სააკაშვილმა გაუხსნა და მძინარე თანამოქალაქეები დაბომბა". დღეს უკვე საქართველოს პრეზიდენტის რანგში ამბობს, რომ "მისი საქმე არ არის პოლიტიკური შეფასებების გაკეთება, თუნდაც წინა ხელისუფლებაზე".

"მე ჩემი აზრი ამ საკითხზე ვთქვი, ვიდრე პრეზიდენტი გავხდებოდი. დღეს, ჩემი, როგორც პრეზიდენტის საქმე არ არის, რომ პოლიტიკური შეფასებები გავაკეთო, თუნდაც წინა ხელისუფლებაზე", — განაცხადა სალომე ზურაბიშვილმა.

მან ასევე თქვა, რომ ვინ დაიწყო ომი მხოლოდ ქვეყნის შიდა საკითხია. მისი თქმით, მოვა დრო, როცა შეიქმნება შიდა კომისია, სადაც ისტორიკოსები და საზოგადოების სხვა წარმომადგენლები ამ საკითხზე იმსჯელებენ.

"მე შემიძლია იმაზე ვილაპარაკო, რაც მე არ უნდა გავაკეთო, მაგრამ თუ ძალიან დაგვაინტერესა ჩვენ, არც ჰააგაში და არც არსად ეს საკითხი არის ჩვენი შიდა საკითხი, რომელზედაც ალბათ მოვა დრო და შეიქმნება შიდა კომისია. ისტორიკოსები დასხდებიან და საზოგადოება იმსჯელებს, მაგრამ ის, რაც გუშინ ვთქვი ამ საკითხზე, არის ყველაზე მნიშვნელოვანი, რომ ომი თუ გახდა ჩვენი კიდევ ერთხელ დაყოფის, გახლეჩის საკითხი, მაშინ ამით ჩვენ საქართველოს ყველა მტერს, ვინც დღეს პროვოკაციაზე მიდის, პროვოკაციულ კითხვებზე, პროვოკაციულ ქმედებებზე, გარე მტრებთან ერთად ის ქმნის ხვალინდელ საფრთხეს ამ ქვეყნისთვის. ამიტომ ამაზე უნდა დაფიქრდეთ, ჩვენ გვჭირდება გაერთიანება და არა ერთმანეთთან დაპირისპირება", — განაცხადა პრეზიდენტმა მუხათგვერდის სასაფლაოზე.

სალომე ზურაბიშვილი აგვისტოს ომზე

კითხვა, თუ ვინ დაიწყო ომი, საქართველომ თუ რუსეთმა, სალომე ზურაბიშვილს პირველად მაშინ დაუსვეს, როცა მან საპრეზიდენტო არჩევნებში მონაწილეობაზე ისაუბრა.

"ჯერ ერთი, უნდა ვიყოთ ტერმინებში სწორი. მე ყოველთვის ვამბობდი და ვამბობ, რომ ომი დაიწყო საუკუნის წინ რუსეთმა, ჩვენ იმ დროს ჩავერთეთ რუსეთის პროვოკაციაში და წავედით ამ საომარ ვითარებაში, საქართველომ დაიწყო ეს ნაწილი ამ საომარი ვითარების. ეს არის ყველასთვის ცნობილი და ოფიციალური ვერსია, რასაც ევროკავშირი ადასტურებდა, ჩვენ ამას არ გადავხედავთ", — თქვა ზურაბიშვილმა.

ზურაბიშვილმა ამ საკითხზე კიდევ ერთხელ ტოქ-შოუ რეაქციაშიც ისაუბრა და განაცხადა, რომ ქართულმა მხარემ თავისი მოსახლეობა დაბომბა, რაც ფაქტებითაა დასაბუთებული.

ზურაბიშვილმა საზოგადოების კრიტიკის შემდეგ აგვისტოს ომის დაწყება განსხვავებულად განმარტა. საარჩევნო შტაბის გახსნის დროს სიტყვით გამოსვლისას ზურაბიშვილმა თქვა, რომ ომი რუსეთმა დაიწყო.

2008 წლის აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე.

2008 წლის ომის დაწყებიდან 11 წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს, იტაცებს ხალხს და მცოცავი ოკუპაციის პირობებში აცხოვრებს საქართველოს.