თბილისის საქალაქო სასამართლომ ჯგუფურად ჩადენილი ყაჩაღობისთვის ბრალდებული სამი პირი დამნაშავედ ცნო. ამის შესახებ განცხადება საქართველოს პროკურატურამ გაავრცელა.

ამავე განცხადებაში ვკითხულობთ, რომ 2019 წლის 19 აპრილს სამი ბრალდებული თბილისში, ვარკეთილის მე-3 მიკრორაიონში მდებარე ლიბერთი ბანკის ფილიალში ჯგუფურად, იარაღისმაგვარი საგნითა და ფეთქებადი ნივთიერების გამოყენებით თავს დაესხა ბანკის თანამშრომლებს. მათ სიცოცხლისა და ჯანმრთელობისთვის საშიში ძალადობის გამოყენების მუქარით მოლარე ოპერატორებს ლიბერთი ბანკის კუთვნილი 2 045 ლარი გასტაცეს და შემთხვევის ადგილიდან მიიმალნენ.

სამართალდამცველებმა სამივე ბრალდებული 2019 წლის 19 აპრილს დააკავა, ორი მათგანი თბილისში, ხოლო ერთი ქუთაისში. თბილისის საქალაქო სასამართლომ ისინი დამნაშავეებად ცნო და სასჯელის სახედ და ზომად 7-7 წლით თავისუფლების აღკვეთა განუსაზღვრა.