საავადმყოფოში თავის ტვინის მძიმე დაზიანებით მოთავსებულ პაციენტთა 15% ბრძანებების საპასუხოდ თვალით უხილავ კოგნიტურ პასუხს იძლევა- ვკითხულობთ სამეცნიერო კვლევაში, რომელიც ჟურნალში New England Journal of Medicine გამოქვეყნდა.

იან კლაასენმა და მისმა კოლეგებმა ნიუ-იორკის კოლუმბიის უნივერსიტეტიდან 104 "კლინიკურად არაკონტაქტური" პაციენტის ტვინის აქტივობა გამოიკვლიეს. ავადმყოფთა უმეტესობა ინსულტის ან ტრავმის დიაგნოზით იყო მოთავსებული კლინიკაში, ზოგიერთი მათგანი კი კომატოზურ მდგომარეობაში იმყოფებოდა. კვლევის მონაწილეებს ერთი რამ აერთიანებდათ: ისინი ვერბალურ ბრძანებებზე ვიზუალურად ხილულ პასუხს ვერ იძლეოდნენ

მკვლევარებმა პაციენტების თავის ტვინის ელექტრული აქტივობა საავადმყოფოში მოხვედრიდან პირველივე დღეებში ელექტროენცეფალოგრამით (ეეგ) გაზომეს. პაციენტებს ყურსასმენებს უკეთებდნენ და სთხოვდნენ ხელი გაემოძრავებინათ, პარალელურად კი ტვინის ელექტრულ აქტივობას იწერდნენ. მიღებული მაჩვენებლები მათ სპეციალური კომპიუტერული ალგორითმის საშუალებით გააანალიზეს. დადგინდა, რომ პაციენტთა 15%-ის ტვინის ელექტრული აქტივობა შეესაბამებოდა იგივე ბრძანებაზე ჯანმრთელი ადამიანის ტვინის ელექტრულ აქტივობას.

"ეს მიუთითებს, რომ ცნობიერება რაღაც დონეზე შენარჩუნებულია, თუმცა ჩვენ დაზუსტებით არ ვიცით, გებულობდა თუ არა პაციენტი ჩვენს ბრძანებას. ჩვენ მხოლოდ ის ვიცით, რომ ტვინს საპასუხო რეაქცია ჰქონდა"- განაცხადა კვლევის ხელმძღვანელმა იან კლაასენმა

"ეს ძალზე დიდი აღმოჩენაა! ტვინის ფუნქციების აღდგენის პარალელურად პაციენტთა ნაწილი შესაძლოა სრულად აანალიზებდეს მის ირგვლივ მიმდინარე პროცესებს და შესაძლოა მათ ესმოდეთ, თუ რაზე საუბრობენ ირგვლივ მყოფები. ეს გიგანტური აღმოჩენაა! აღნიშნულმა შესაძლოა მსოფლიოს მასშტაბით არსებული პრაქტიკები შეცვალოს"- განაცხადა ნიკოლას შერიფმა, ნიუ-იორკის Weill Cornell Medical College-ის ნევროლოგიისა და ნეირომეცნიერების დეპარტამენტის პროფესორმა.

ექიმი ნიკოლას შერიფის აღფრთოვანებას ზოგიერთი ექიმი სკეპტიკურად უყურებს. "ამგვარი მიდგომა ჯერ არ არის მზად სტანდარტულ პრაქტიკაში დასამკვიდრებლად. ტრავმის შემდგომ ასე ადრეულ ეტაპზე საბოლოო გამოჯანმრთელების შესახებ პროგნოზების გაკეთება პრაქტიკულად შეუძლებელია"- აღნიშნავს ფლორა ჰემონდი, ინდიანას სამედიცინო უნივერსიტეტის ფიზიკური ჯანმრთელობისა და რეაბილიტაციის დეპარტამენტის ხელმძღვანელი.

მკვლევარები პაციენტთა გამოჯანმრთელების პროცესს 1 წელი აკვირდებოდნენ. ტრავმიდან 1 წლის თავზე იმ პაციენტთა 44%-ს, რომლებსაც ბრძანებებზე საპასუხო ტვინის ელექტრული აქტივობა აღენიშნებოდათ, უკვე დამოუკიდებლად შეეძლოთ თავის მოვლა. აღნიშნული მაჩვენებელი მხოლოდ 14%-ს წარმოადგენდა პაციენტთა იმ ჯგუფში, რომლებიც ტვინის ელექტრულ აქტივობას არ ამჟღავნებდნენ.

უფრო ზუსტი დასკვნების გასაკეთებლად შემდგომი ფართომასშტაბიანი კვლევებია საჭირო.