მწერალთა ნაწილი სრულ დაუმორჩილებლობას უცხადებს ხელისუფლებას და კულტურის სამინისტროს. ისინი ეწინააღმდეგებიან ახალშექმნილ ქართულ ლიტერატურულ ფონდს, ასევე მწერალთა სახლისა და ქართული წიგნის ეროვნული ფონდის ერთ ორგანიზაციად გაერთიანებას.

"ჩვენი ბოიკოტი იქნება ყოვლისმომცველი და ხმაურიანი, მასში ჩაერთვება საერთაშორისო სამწერლო საზოგადოება, ჩვენ მოვძებნით ალტერნატიულ ხერხებს ჩვენი წიგნების დასასტამბად — ეს იქნება დროებითი ზომა, ჩვენს სრულ გამარჯვებამდე, ხსენებულ სფეროში სტატუს კვოს აღდგენამდე და სრულ სამუშაო პროცესში დაბრუნებამდე", — წერენ მწერლები.

მათი აზრით, ხელისუფლება ვერ ხედავს წიგნის ცენტრისა და მწერალთა სახლის მიღწევებს და წიგნის სფეროსთან დაკავშირებულ ადამიანებს ანგარიშს არ უწევს.

"შეხვედრები, რომლებზეც ქვეყნისა თუ სფეროს მესვეურები გვეპატიჟებიან, არის ფაქტების კონსტანტირებისა და მათ მიერ შექმნილ სურათზე ჩვენი დათანხმების მცდელობა. ბოლო ხანებში გვრჩება შთაბეჭდილება, რომ ჩვენი ქვეყნის ღირსეულად მსახურებისთვის ჩვენი სფეროს ადამიანები მხოლოდ ისჯებიან. მაგრამ ქართველი მწერლები, როგორც ხელოვანი ადამიანების ერთობა, თუნდაც როგორც მის გარეთ მდგომი ცალკეული ხელოვანები, ასევე არ ვაღიარებთ ასეთი ხელისუფლების, ასეთი მინისტრების და მათი მოადგილეების მორალურ უფლებას, შეგვიცვალონ სამუშაო გარემო", — წერენ ისინი.

მწერალთა სახლი 20 ივნისს გაუქმდა და მის ნაცვლად ქართული ლიტერატურის ეროვნული ფონდი შეიქმნა, რომელსაც მწერალთა ნაწილი ბოიკოტს უცხადებს. მწერალთა სახლი 2008 წლის 23 ოქტომბერს საქართველოს პრეზიდენტის ბრძანებულების საფუძველზე შეიქმნა. ორგანიზაცია ცნობილი ქართველი მეწარმისა და მეცენატის დავით სარაჯიშვილის მიერ 1905 წელს აშენებულ, ისტორიულ მაჩაბლის #13-შია განთავსებული. ამავე შენობაში 1921-2007 წლებში მუშაობდა საქართველოს მწერალთა კავშირი.