თბილისში პარლამენტის შენობასთან მიმდინარე აქციაზე შინაგან საქმეთა მინისტრის, გიორგი გახარიას ბიუსტი მიიტანეს, რომელიც "ბოდიშს იხდის".

აქციის მონაწილეებმა გახარიას ბიუსტს ცალ თვალი აუხვიეს, რაც 20 ივნისის მოვლენების სიმბოლოდ იქცა. ზუსტად ამ ფორმით მოუწია 18 წლის გოგოს კლინიკის დატოვება, სადაც მას აქციის დროს დაზიანებული თვალი ამოაჭრეს.

"იქნებ დაეხმაროს ეს ასახვევი, რომ უთანაგრძნოს იმ ადამიანებს ვინც იმ დღეს დასახიჩრდა და დაეხმაროს, შეასრულოს ქართული საზოგადოების მოთხოვნა და გადადგეს" — თქვა აქციის ერთ-ერთმა მონაწილემ.

აქცია #სირცხვილია პარლამენტთან მეხუთე დღეა მიმდინარეობს. დღეს აქციის მონაწილეების ერთი მოთხოვნა დაკმაყოფილდა, მთავრობა დათანხმდა 2020 წლის არჩევნების პროპორციული წესით ჩატარებას.

უცვლელი რჩება აქციის მონაწილეების ორი მოთხოვნა შინაგან საქმეთა მინისტრის, გიორგი გახარიას გადადგომა და 20 ივნისის ღამეს სპეცოპერაციის დაშლის შემდეგ დაკავებულების გათავისუფლება.