საქართველოს ეროვნული ბანკის ყოფილი პრეზიდენტი, გიორგი ქადაგიძე დღეს, 22 ივნისს აქციაზე შეკრებილებს სიტყვით მიმართავს. ის რუსეთის მიერ საქართველოსთან ფრენების აკრძალვას გამოეხმაურა:

"მინდა გამოვეხმაურო მოსაზრებას, თითქოს ეს მნიშველოვნად დაარტყამს ეკონომიკას და შეუქმნის პრობლემას. ეს არის რუსული პროპაგანდა და არ მოვტყუვდებით. ყველა ქვეყანა, რომელმაც შეძლო და თავი დააღწია ბოროტების იმპერიას, დღეს არის განვითარებული და აყვავებული ქვეყნები. ეს ქვეყნები დღეს ჩვენ გვერდზეა. ესაა ლიტვა, ლატვია, ესტონეთი, პოლონეთი, ფინეთი და საქართველო ჩაეწერება მათ რიგებში".

ქართული კომპანიებისთვის რუსეთში ფრენების აკრძალვის შესახებ ინფორმაცია დღეს, 22 ივნისს რუსეთის ტრანსპორტის სამინისტრომ გაავრცელა. ტრანსპორტის სამინისტროში აცხადებენ, რომ ქართული ავიაკომპანიებს ფრენები რუსეთის მიმართულებით აღდგება მას შემდეგ, რაც დადასტურდება საავიაციო უსაფრთხოება და საქართველო სანავიგაციო მომსახურებისთვის დაგროვებულ დავალიანებას გადაიხდის. სამინისტროს თქმით, საქართველოს მხარეს 792 543,19 აშშ დოლარისა (2 195 344,61 ლარი) და 592 251,95 (25 999,02)რუსული რუბლის ოდენობის დავალიანება აქვს.

გუშინ, 21 ივნისს ვლადიმერ პუტინმა საქართველოს მიმართულებით რუსული ავიაკომპანიების ფრენები აკრძალა. "რუსეთის ნაციონალური უსაფრთხოების უზრუნველსაყოფად" ასე ჰქვია დოკუმენტს, რომელშიც პუტინი აცხადებს, რომ 2019 წლის 8 ივლისიდან რუსულ ავიაკომპანიებს, მათ შორის კომერციულებს დროებით ეკრძალებათ რუსეთის ფედერაციიდან საქართველოს მიმართულებით ფრენა.