ჯონათან ფრენზენი თანამედროვე ამერიკული ლიტერატურის ერთ-ერთი ცოცხალი კლასიკოსია. მისი ყველაზე ცნობილი წიგნი, შესწორებები კი, რომელიც 2001 წელს გამოვიდა, ბევრი გავლენიანი კრიტიკოსისა და გამოცემის აზრით, 21-ე საუკუნის საუკეთესო ტექსტს წარმოადგენს. ფრენზენი ქართულად პირველად ითარგმნა და იმედია, ამ ავტორს ქართველი მკითხველი სათანადოდ დააფასებს.

ჯონათან ფრენზენი 1959 წელს დაიბადა და 90-იან წლებში პირველი რომანები გამოსცა. როგორც თავად დღეს ამბობს, "ისინი არაფრად ვარგოდა" და საკუთარი "ნორმალური" რომანების ათვლას სწორედ შესწორებებიდან იწყებს. ფრენზენს კონტროვერსული გამოხტომები სჩვევია ხოლმე და მათ შორის, საკუთარი შემოქმედების შესახებაც არაერთხელ უხუმრია ცუდად. თუმცა, ეს თვითირონია მისი, როგორც ავტორის ერთ-ერთი საუკეთესო თვისებაცაა.

ფოტო: ბაკურ სულაკაურის გამომცემლობა

2001 წლის შემოდგომაზე, შესწორებების გაყიდვაში გამოსვლა თანამედროვე ამერიკის ისტორიაში ყველაზე მძიმე დღეებს დაემთხვა. სულ რამდენიმე დღის შემდეგ 11 სექტემბრის ტერაქტი მოხდა და წიგნისთვის აღარავის ცხელოდა. თუმცა, გარკვეული დროის შემდეგ, შესწორებები ამერიკელმა მკითხველმა ტრაგედიის გამოგლოვების შემდეგ ახლებურად მიიღო. წიგნში წამოწეული საკითხები ამერიკელებმა ახლობლების დაკარგვის შედეგად გამოწვეული სტრესის ფონზე გადაიაზრეს და სწორედ ლამბერტების დისფუნქციური ოჯახის საგა აღმოჩნდა ის ისტორია, რომელთანაც ამერიკელმა მკითხველმა საკუთარი თავის იდენტიფიცირება მოახდინა. შედეგად კი, წიგნი ბესტსელერი გახდა.

მიუხედავად იმისა, რომ შესწორებები როგორც მოცულობით, ასევე მნიშვნელობით უდიდესი ნაწარმოებია, არსებობს ხუმრობაც, რომ ეს წიგნი — კითხულობს ხალხი მას თუ არა, ყველა ამერიკული ოჯახის თაროს ამშვენებს. რომანი 35-ზე მეტ ენაზე ითარგმნა და მილიონობით ტირაჟით გაიყიდა. ჯონათან ფრენზენს "წიგნის ნაციონალური პრემია" და სხვა არაერთი მნიშვნელოვანი პრიზი აქვს მიღებული.

თამარ ჯაფარიძის შესანიშნავი თარგმანი ამერიკული ლიტერატურის მოყვარულებს საშუალებას გვაძლევს, ეს ბრწყინვალე ტექსტი ქართულადაც წავიკითხოთ და შევიყვაროთ. შესწორებები სწორედ ის ნაწარმოებია, რომლის გამოც თამამად შეგვიძლია ვთქვათ — დიდი ამერიკული რომანის იდეა 21-ე საუკუნეშიც ცოცხლობს და სიკვდილს ჯერჯერობით არ აპირებს.

წიგნის შესახებ, გადაცემა შაბათის შუადღეში ქეთი დევდარიანმა ისაუბრა.