ტრანსგენდერი ადამიანები თბილისი პრაიდის კვირეულის ფარგლებში დაგეგმილ ღირსების მარშს არ უერთდებიან. ამის შესახებ თემის წევრმა, გაბრიელამ პრაიმტაიმის პრესკლუბში ისაუბრა.

მისი თქმით, ისინი პატივს სცემენ თბილისი პრაიდსა და მათი ორგანიზატორების სულისკვეთებას და მოუწოდებენ მათ, ტრანსგენდერი ადამიანების ეს გადაწყვეტილება "მტრულად არ მიიღონ". მისივე თქმით, უარს მათი სიცოცხლისა და ჯანმრთელობის დასაცავად ამბობენ.

"ლგბტქ აქტივისტებთან ერთად ვიყავით და ვიქნებით უთანასწორობასთან ბრძოლაში, ვიდექით და დავდგებით იმ ადამიანების გვერდით, ვინც იბრძვის თემის ხილვადობის გაზრდისა და უფლებების დასაცავად. თუმცა, სამწუხაროდ, ჩვენ ვთვლით, რომ პრაიდზე გასვლა თუ არ გასვლა, ვერ შეგვიმსუბუქებს იმ რთულ მდგომარეობასა და დაუცველობის შეგრძნებას, რომელიც დღეს ჩვენ გვაქვს", — აცხადებს გაბრიელა.

ტრანსგენდერი ადამიანები მოუწოდებენ შინაგან საქმეთა სამინისტროს, ივნისის თვეში მათზე გახშირებული თავდასხმების გამო დაუყოვნებლივ მიიღონ ზომები და მათი უსაფრთხოება დაიცვან.

"2013 წლის 17 მაისის მოვლენების შემდეგ მივიჩნიეთ, რომ თემის წევრებზე თავდასხმები გახშირდებოდა და ამისთვის ყოველთვის მზად ვიყავით, მაგრამ პრაიდის დაანონსების შემდეგ თავდასხმები სექსსამუშაოში ჩართულ ქალებზე სისტემატიური ხასიათი მიიღო", — ამბობს გაბრიელა.

თბილისი პრაიდის კვირეული 18-დან 23 ივნისის ჩათვლით გაიმართება. კვირეული ღირსების მარშით დასრულდება.