მოსკოვში სამართალდამცავებმა საპროტესტო აქციის 400-ზე მეტი მონაწილე დააკავეს. ინფორმაციას ამის შესახებ პროექტი OVD-Info ავრცელებს, ოფიციალური ინფორმაციით კი დაკავებულების რაოდენობა ორჯერ ნაკლებია. დაკავებულებს შორის არიან ჟურნალისტები, სამოქალაქო აქტივისტები, მათ შორის, ოპოზიციონერი ალექსეი ნავალნი.

საპროტესტო მარში ივან გოლუნოვის მხარდასაჭერად და გაყალბებული სისხლის სამართლის საქმეების წინააღმდეგ მოეწყო. აქცია მოსკოვის მერიასთან შეთანხმებული არ არის, რის გამოც პოლიციამ დემონსტრანტების დაკავება დაიწყო. სამართალდამცავებმა მოქალაქეების წინააღმდეგ ხელკეტი და წყალი გამოიყენეს.

მარშის დაწყებამდე მოქალაქეებმა ერთ-ერთ მეტროსადგურთან დაიწყეს შეკრება. სამართალდამცავები თავიდან მოუწოდებდნენ აქციის მონაწილეებს, რომ დაშლილიყვნენ და გამვლელებისთვის გზა დაეთმოთ. მარშის დაწყების შემდეგ კი აქციის მონაწილეების დაკავება დაიწყეს.

ფოტო: ევგენი ფელდმანი / Meduza

ფოტო: ევგენი ფელდმანი / Meduza

ფოტო: ევგენი ფელდმანი / Meduza

ფოტო: ევგენი ფელდმანი / Meduza

ფოტო: ევგენი ფელდმანი / Meduza

ფოტო: ევგენი ფელდმანი / Meduza

ფოტო: ევგენი ფელდმანი / Meduza

გამომძიებელი ჟურნალისტი ივან გოლუნოვი 6 ივნისს დიდი ოდენობით ნარკოტიკული საშუალების გასაღების მცდელობის ბრალდებით დააკავეს. მის დაკავებას დიდი საზოგადოებრივი პროტესტი მოჰყვა. 11 ივნისს ბრალდების დაუდასტურებლობის გამო მის წინააღმდეგ სისხლისსამართლებრივი დევნა შეწყდა.

თვითონ გოლუნოვმა განაცხადა, რომ მარშზე მისვლას არ აპირებს და სხვებს ურჩია რომ 12 ივნისი ახლობლებთან გაატარონ.

აქციის მოწყობასთან დაკავშირებით ორგანიზატორებმა მოსკოვის მერიასთან შეთანხმებას ვერ მიაღწიეს. ამის გამო ორგანიზატორებმა ქუჩაში გამოსვლისკენ არავის მოუწოდეს, თუმცა განაცხადეს, რომ სურვილის შემთხვევაში ჩისტიე პრუდის მეტროსადგურთან იკრიბებოდნენ.