მოსკოვის ცენტრში, სადაც ჟურნალისტ ივან გოლუნოვის მხარდასაჭერი აქცია მიმდინარეობს, ოპოზიციონერი ალექსი ნავალნი დააკავეს. 2011 წლის შემდეგ ნავალნი ადმინისტრაციული წესით 10-ჯერ ჰყავთ დაკავებული. TV Rain-ის ინფორმაციით, მიტინგის მოწყობის შესახებ კანონის განმეორებით დარღვევისთვის ნავალნის 30 დღემდე პატიმრობა ემუქრება.

საპროტესტო მსვლელობა მოსკოვის მთავრობასთან შეთანხმებული არაა, რის გამოც პოლიციელებმა დემონსტრანტების დაკავება დაიწყეს. Meduza-ს ინფორმაციით, 200-ზე მეტი პირია დაკავებული. სამართალდამცავებმა მოქალაქეების წინააღმდეგ ხელკეტი და წყალი გამოიყენეს.

მარშის დაწყებამდე მოქალაქეებმა ერთ-ერთ მეტროსადგურთან დაიწყეს შეკრება. სამართალდამცავები თავიდან მოუწოდებდნენ აქციის მონაწილეებს, რომ დაშლილიყვნენ და გამვლელებისთვის გზა დაეთმოთ. მარშის დაწყების შემდეგ კი აქციის მონაწილეების დაკავება დაიწყეს. პროექტ OVD-Info-ს ინფორმაციით, დაკავებულებს შორის არიან Meduza-ს, TV Rain-ის და სხვა გამოცემების ჟურნალისტები.

ფოტო: TV Rain

ფოტო: TV Rain

ფოტო: TV Rain

ფოტო: TV Rain

ფოტო: TV Rain

გამომძიებელი ჟურნალისტი ივან გოლუნოვი 6 ივნისს დიდი ოდენობით ნარკოტიკული საშუალების გასაღების მცდელობის ბრალდებით დააკავეს. მის დაკავებას დიდი საზოგადოებრივი პროტესტი მოჰყვა. 11 ივნისს ბრალდების დაუდასტურებლობის გამო მის წინააღმდეგ სისხლისსამართლებრივი დევნა შეწყდა.

თვითონ გოლუნოვმა განაცხადა, რომ მარშზე მისვლას არ აპირებს და სხვებს ურჩია რომ 12 ივნისი ახლობლებთან გაატარონ.

აქციის მოწყობასთან დაკავშირებით ორგანიზატორებმა მოსკოვის მერიასთან შეთანხმებას ვერ მიაღწიეს. ამის გამო ორგანიზატორებმა ქუჩაში გამოსვლისკენ არავის მოუწოდეს, თუმცა განაცხადეს, რომ სურვილის შემთხვევაში ჩისტიე პრუდის მეტროსადგურთან იკრიბებოდნენ.