გიორგი ვაშაძემ ნაციონალური მოძრაობა დატოვა. ამის შესახებ მან განცხადება დღეს, 5 მაისს, გააკეთა.

ერთიანი ნაციონალური მოძრაობის უკვე ყოფილმა წევრმა თავის Facebook გვერდზე განმარტა, რომ საზოგადოების მოლოდინი იმასთან დაკავშირებით, რომ ახალი პოლიტიკური კულტურა დამკვიდრდებოდა, რომელიც საქართველოს ახალ პერსპექტივასა და განვითარების შესაძლებლობას მოუტანდა, ნაციონალურმა მოძრაობამ ვერ გაამართლა. მისი თქმით, ამის ნაცვლად საზოგადოებამ დახურული კაბინეტური მმართველობის სისტემა იხილა, რომელიც, მისი ბუნებიდან გამომდინარე, ივანიშვილის მავნებლური მმართველობის მოკავშირეა და მხოლოდ პარტიის ერთი მცირე ჯგუფის პერსონალურ ინტერესებს ემსახურება:

"ამ კაბინეტურ მმართველობას აქვს თავის სახელები და გვარები: გიგა ბოკერია, მიშა მაჭავარიანი, ხათუნა გოგორიშვილი, გოკა გაბაშვილი და მათ ფასადად ქცეული დავით ბაქრაძე".

ვაშაძის თქმით, მას არ სურს გარანტირებული ადგილი მომავალ პარლამენტში. მისი განმარტებით, ის აპირებს ახალი მოძრაობის შექმნას:

"მთავარი პრინციპი იქნება ახალი ადამიანები პოლიტიკაში, ახალი პოლიტიკური კულტურით, ახალი იდეებითა და გადაწყვეტილების მიღების ახალი მექანიზმებით".