#გოგონებისთვის — ამ სახელწოდებით ფეისბუქზე ვიდეოკამპანია დაიწყო. ქალთა უფლებებზე მომუშავე აქტივისტები ვიდეომიმართვებს ავრცელებენ და საზოგადოებას ჩართულობისკენ მოუწოდებენ. მიმართვის შინაარსი არასრულწლოვან გოგოებთან დაკავშირებულ ისეთ პრობლემებს უკავშირდება, როგორიც სექსუალური ძალადობა, შევიწროება და იძულებითი ქორწინებაა. ისინი სამართალდამცავებს, სახელისუფლებო შტოებს მიმართავენ და ძალადობის შემთხვევების დროს სწრაფი და სწორი რეაგირებისკენ მოუწოდებენ.

ონლაინკამპანიის ორგანიზატორი არასამთავრობო ორგანიზაცია საფარის ხელმძღვანელი ბაია პატარაიაა. ვიდეომიმართვების ჩაწერის იდეა მას შემდეგ გაუჩნდა, რაც რეგინფომ ორჯერ გაუპატიურებული არასრულწლოვნის შესახებ დაწერა. ის კახეთში მცხოვრები ეთნიკურად აზერბაიჯანელია, მოძალადე გაუპატიურების პირველი შემთხვევიდან დღემდე თავისუფალი იყო. უფრო მეტიც, გოგო მასთან ცხოვრობდა და ამბობდა, რომ "ყველაფერი აპატია". შსს-მ სავარაუდო მოძალადე მას შემდეგ დააკავა, რაც რეგინფომ სტატია გამოაქვეყნა, ხოლო სოციალურ ქსელში მხარდამჭერი ვიდეოები აიტვირთა.

ბაია პატარაიას თქმით, საქართველოში მცხოვრები ეთნიკურად აზერბაიჯანელი არასრულწლოვანი გოგოები განსაკუთრებული პრობლემების წინაშე დგანან, როგორიცაა იძულებითი ქორწინება, მოტაცება და გაუპატიურება ცოლად შერთვის მიზნით.

"თუ ეთნიკურად ქართველ გოგოებს აქვთ მსგავსი პრობლემები ბევრად უფრო ნორმალურად რეაგირებს სახელმწიფო, ხოლო ეთნიკურად აზერბაიჯანელ გოგოებთან დაკავშირებით გვაქვს გულგრილობა", — უთხრა On.ge-ს ბაია პატარაიამ.

მისი განცხადებით, საგარეჯოში მომხდარი შეხვედრის დროს საკითხი სავარაუდო მოძალადის დაკავებით არ ამოწურულა და ახლა სახელმწიფომ მთელი რიგი ღონისძიებები უნდა განახორციელოს, მათ შორისაა გოგოს თავშესაფარში გადაყვანა, ფსიქოლოგიური დახმარების გაწევა და სხვა მხარდამჭერი პროგრამები.

ის ამბობს, რომ კამპანია, არასრულწლოვნების მიმართ განხორციელებულ ძალადობის წინააღმდეგაა მიმართული. ისინი, ეტაპობრივად, სხვადასხვა პრობლემურ თემას წამოჭრიან და გადაჭრის გზებზეც იმუშავებენ.

"ქალების პრობლემები ერთია და გოგოებს აქვთ განსხვავებული პრობლემები. აქ განათლების სამინისტროსა და სოციალური მუშაკის როლი არის ძალიან დიდი, რომელბიც პასიურები არიან", — აცხადებს ბაია პატარაია.

კამპანიის ფარგლებში გავრცელებული ვიდეომიმართვები

ეთნიკურად აზერბაიჯანელი ჟურნალისტი, კამილა მამედოვა: მოდით, წარმოვიდგინოთ, რომ ჩვენს სახლში არიან გოგოები, რომლებიც შეიძლება გაიტაცონ, როდესაც მათ თოჯინებთან თამაში სურთ, როდესაც მას კლასელებთან ურთიერთობა უნდათ და ვაუპატიურებთ ყოველ დღე ამ ბავშვებს და არ ვიცავთ იმიტომ, რომ ვეუბნებით — "ეს ტრადიციაა". ვატყუებთ და ვაჯერებთ, რომ ეს ამ თემისთვის ნორმალურია და მოდით, შევეგუოთ.

სახელმწიფო, რომელმაც უნდა უზრუნველყოს ამ ბავშვის, პატარა ქალის დაცვა, დუმს. ყველაზე მარტივია შეეგუო სტერეოტიპს იმიტომ, რომ შენ თვითონ ვერ იცავ. ვერ აძლევ ამ ბავშვს საშუალებას მიიღოს განათლება, იგრძნოს თავი დაცულად, როცა გადის სახლიდან. ეს ძალადობაა, რომელსაც ტრადიციაში ფუთავს სახელმწიფო".

ჟურნალისტი ნათია ორველაშვილი: "თუ ის ფაქტი, რომ 14 წლის ბავშვს დაემართა ასეთი რაღაც არ იწვევს საკმარის თანაგრძნობას, მაშინ წარმოიდგინეთ ამ გოგონას ადგილას თქვენთვის ძვირფასი ადამიანი და, იქნებ, მაშინ მაინც აღასრულოთ სამართალი, გააკეთეთ ეს გოგოებისთვის, თქვენი გოგოებისთვის, ჩვენი გოგოებისთვის, ადამიანებისთვის".

ქალთა მოძრაობის წევრი, იდა ბახტურიძე საქართველოს სახალხო დამცველს, ნინო ლომჯარიასა და შს მინისტრის მოადგილეს ნათია მეზვრიშვილს მოუწოდებს ჩავიდნენ კახეთში და დაინტერესდნენ სექსუალური ძალადობის მსხვერპლი გოგოს ბედით. ასევე, მან მოუწოდა პარლამენტის გენდერული საბჭოს ხელმძღვანელს თამარ ჩუგოშვილს ჩაიბაროს ანგარიში ქალთა მიმართ სექსუალური ძალადობის საკითხებზე.

"რატომ ხდება ისევ ამ ქვეყანაში, როცა ქალების მიმართ სასტიკი დანაშაულები ხდება და დამნაშავეები თავისუფლად დაიარებიან, მიუხედავად მათ მიმართ გამოტანილი გამამტყუნებელი განაჩენისა?", — ამბობს იდა ბახტურიძე ვიდეომიმართვაში.

ორგანიზაცია ქალები რეგიონის განვითარებისთვის წარმომადგენელი ქეთევან ხიდაშელი სექსუალური ძალადობის შემთხვევების დროს განათლების სამინისტროსა და სკოლების არასწორ რეაგირებაზე ამახვილებს ყურადღებას. მისი თქმით, 14 წლის გოგოსთვის ფსიქოლოგიური დახმარება სკოლას უნდა შეეთავაზებინა.

"სამართალდამცავი ორგანოების წარმომადგენლები ვერ აცნობიერებენ, რა განსხვავებაა ზრდასრულ ქალსა და არასრულწლოვანს შორის. ისინი თვლიან, რომ თუ კაცის მხრიდან ადგილი ჰქონდა ოჯახის შექმნის "დიად" მიზანს მის მიმართ უნდა გამოიყენონ ლოიალობა. ეს ისტორია კარგად ასახავს სოციალური მომსახურების სააგენტოსა და განათლების სამინისტროს ჩართულობას ასეთ შემთხვევებში.

შედეგად, მივიღეთ გოგო, რომელსაც წაართვეს ბავშვობა, დაუმახინჯეს ფსიქიკა. არასრულწლოვნების მიმართ სექსუალური დანაშაული გახშირებულია, ალბათ შსს შემოგვედავება და გვეტყვის, რომ მათ გვერდზე გამოქვეყნებული სტატისტიკა სრულიად სხვა სურათს ხატავს, თუმცა თუ საქმეების კვალიფიკაციას გადავხედავთ მივხვდებით, სად იმალება ძაღლის თავი", — ამბობს ქეთევან ხიდაშელი.

ფემინისტური ჯგუფის ქალთა მზერის დამფუძნებელი, გვანცა ხონელიძე: "ჩვენი უწყებები და სახელმწიფო სისტემები საერთოდ უგულებელყოფენ ქალების უფლებებსა და საჭიროებებს. ინფორმაციის გავრცელებისთანავე ყველა ღირსეული პოლიტიკოსი ჩავიდოდა ადგილზე და გაეცნობოდა სიტუაციას, მაგრამ ეს ასე არ მოხდა. ამ გოგოს დავკარგავთ, თუ მისი ფსიქოლოგიური რეაბილიტაციისთვის არ ჩაიდება რესურსი. ეს ერთი ტრაგიკული და ჯოჯოხეთური შემთხვევა აჩვენებს იმას, თუ როგორ არის სრულიად ნეიტრალური და არ ერგება ჩვენს საჭიროებებს ჯანდაცვის სამინისტრო და სამართალდამცავი უწყებები".

ქალთა უფლებებზე მომუშავე ორგანიზაციების წარმომადგენლები ხვალ, 10 ივნისს, 17:00 საათზე პრესკონფერენციას გამართავენ. აზერბაიჯანელი ქალი აქტივისტები თავად ისაუბრებენ იმ პრობლემაზე, რომელიც აზერბაიჯანელ ქალებს აქვთ საქართველოში. ეს იქნება ერთ-ერთი აქტივობა ამ კამპანიის ფარგლებში.

"ერთი პრობლემისა და ერთი შემთხვევის მოგვარება, სამწუხაროდ, არაფერს არ ნიშნავს. ტრადიციად შეფარულ დანაშაულს რომ ღია ბრძოლა უნდა გამოუცხადოს სასამართლომ, ეს ვერავის გავაგებინეთ. ჩვენ უნდა გავაგრძელოთ მუშაობა", — ამბობს ბაია პატარაია.

ძალადობის სტატისტიკა

ჯანდაცვის სამინისტროს სოციალური მომსახურების სააგენტოს ინფორმაციით, 2018 წელს ბავშვებზე სექსუალური ძალადობის 70 შემთხვევა აღირიცხა. მათგან ნახევარი — დადასტურდა.

შსს-ს ოფიციალური ინფორმაციით, 2018 წელს, არასრულწლოვანის მიმართ სქესობრივი თავისუფლებისა და ხელშეუხებლობის წინააღმდეგ ჩადენილი დანაშაულის 287 შემთხვევა დაფიქსირდა. 2017 წელს დარეგისტრირდა 224 შემთხვევა.

სახალხო დამცველის 2018 წლის ანგარიშის მიხედვით, საქართველოში თითქმის ყოველ დღე, ერთი ბავშვი სექსუალური ძალადობის მსხვერპლი ხდება.