თბილისის მერის, კახა კალაძის თქმით, ჭავჭავაძის რეაბილიტაციის გამო მეტრო დელისიდან აბაშიძის, ვაკისა და ბარნოვის ქუჩის გავლით ავტობუსების დროებითი მარშრუტი ამოქმედდება. ეს მარშრუტი ვერას, მთაწმინდასა და სოლოლაკს გაივლის და მოძრაობას ბარათაშვილზე დაასრულებს.

კალაძის თქმით, ახალი მარშრუტები მოსახლეობის თხოვნით დაინიშნა. დროებით მარშრუტზე იმოძრავებს, როგორც მიკროავტობუსები, ისე 8-მეტრიანი ავტობუსები.

"ჩვენ მძიმე მდგომარეობა გვაქვს, მიწისქვეშა კომუნიკაციების თვალსაზრისით. ეს არის საკანალიზაციო ქსელების გაუმართაობა, წყალომარაგება, სანიაღვრე სისტემის არარსებობა. სადაც შევდივართ ყველაფერი უნდა გავაკეთოთ ისე, რომ ეს პრობლემა იყოს მოგვარებული", — განაცხადა კახა კალაძემ.

29 მაისიდან, თბილისში, ილია ჭავჭავაძის გამზირის პირველი მონაკვეთი რეაბილიტაციისთვის გადაიკეტა. თბილის მერის კახა კალაძის თქმით, პირველ ეტაპზე გზა დაკეტილი იქნება თბილისის სახელმწიფო უნივერსიტეტის პირველი კორპუსიდან პიქსელის შენობამდე.

გზის რეაბილიტაციის გარდა, თბილისის მერია გეგმავს ილია ჭავჭავაძის გამზირზე მოაწყოს საფეხმავლო ბილიკები, დააყენოს ახალი განათებები, დაიწყოს გამწვანებითი სამუშაოები და მოაწყოს საავტობუსო ზოლები. მერია ასევე გეგმავს, რომ ჭავჭავაძის გამზირზე ურნები მიწის ქვეშ ჩაიტანოს.

სარეაბილიტაციო სამუშაოების მიმდინარეობის პერიოდში დროებით შეიცვლება საზოგადოებრივი ტრანსპორტის მარშრუტები.