იაპონური სახლები ხშირად ზომით მოკრძალებულია, თუმცა მათი დიზაინი სივრცის გამოყენების სრულიად ახალ გზებს გვთავაზობს. დიზაინში თითოეული დეტალი ზუსტადაა გააზრებული, რათა მცირე ფართობიც კი მაქსიმალურად ფუნქციური და კომფორტული გახდეს.

აი, ის 10 ინოვაციური სახლი იაპონიაში, რომლებიც მცირე სივრცეს დიდ შესაძლებლობად აქცევს:

1. Love2 House, ტოკიო

ტოკიოში მდებარე ეს 10 კვადრატული მეტრის სახლი არქიტექტორ ტაკეში ჰოსაკასა და მის მეუღლეს ეკუთვნით. მცირე ზომის მიუხედავად, აქ ყოველდღიური ცხოვრებისთვის საჭირო ყველა სივრცეა მოწყობილი, დახრილი კედლები კი ინტერიერს ზემოდან შემოსული ბუნებრივი სინათლით ავსებს.

2. Building Frame House, ტოკიო

ტოკიოში მდებარე ეს სახლი წყვილისთვის დააპროექტეს. ტრადიციული კედლების ნაცვლად, საცხოვრებელი სივრცეები სხვადასხვა სიმაღლეზე განთავსებული, ერთმანეთში ჩართული იატაკებითაა გამოყოფილი, რომლებიც ერთდროულად ტიხრების, სათავსოებისა და ავეჯის ფუნქციას ასრულებს.

3. Tiny Home is Tall, ტოკიო

დიზაინერულმა სტუდიამ ეს სამსართულიანი სახლი სულ რაღაც 30 კვადრატული მეტრის ნაკვეთზე ააშენა. მცირე სივრცეში სახურავის ტერასა, დახრილ კედელში ჩაშენებული აბაზანა და მეორე სართულზე მოწყობილი პატარა ბაღიც კი მოათავსეს, მაღალი ფანჯრები კი სახლს ბუნებრივად ანიავებს.

4. Cat House, კამაკურა

არქიტექტორმა ეს სახლი საკუთარი ოჯახისა და ორი კატის საჭიროებების გათვალისწინებით დააპროექტა. მის ცენტრში 23-საფეხურიანი სპირალური კიბეა, რომელიც კატის ნაბიჯზეა მორგებული, ოთახები კი მის გარშემო ხის ტოტებივით ნაწილდება.

5. Pale Veil, ტოკიო

ტოკიოში, რკინიგზასა და მთავარ გზას შორის მოქცეულ ამ ბინაში 40 კვადრატული მეტრის აივანი შიდა და გარე სივრცეებს ერთმანეთთან აკავშირებს. გამჭვირვალე ქსოვილის მოძრავი ფარდა კი სინათლეს არეგულირებს და ზაფხულში მზის მცხუნვარე სხივებს ფილტრავს.

6. Hut and Tower House, ტოკიო

ტოკიოში მდებარე ეს ხუთსართულიანი საოჯახო სახლი ერთმანეთზე დაწყობილი კუბებისგან შედგება. მთავარ კოშკს ქუჩისკენ პატარა მინაშენი უერთდება, რომელიც სტუმრების ოთახად ან სამუშაო სივრცედ გამოიყენება, სპირალური კიბე კი საძინებლებს, მისაღებსა და ზედა სართულის სათამაშო ოთახს აკავშირებს.

7. Tokyo Blue Apartment, ტოკიო

1970-იანი წლების ეს სტანდარტული ბინა დიზაინერულმა სტუდიამ ფერების, განათებისა და სპეციალურად დამზადებული სათავსოების დახმარებით სრულიად გარდაქმნა. იატაკზე გავლებული კობალტისფერი ზოლი სხვადასხვა სივრცეს გამოყოფს, ოთახებს ერთმანეთთან აკავშირებს და ჩვეულებრივ ბინას ინდივიდუალურ ხასიათს სძენს.

8. House with Membrane Roof, ტოკიო

ტოკიოს მჭიდროდ დასახლებულ უბანში მდებარე ამ სახლს სამი მხრიდან სხვა შენობები აკრავს, ამიტომ არქიტექტორებმა ბუნებრივი სინათლის შემოსატანად უჩვეულო სახურავი შექმნეს. სახურავი მზის შუქს ფილტრავს და ოთახებში თანაბრად ანაწილებს, ამავე დროს კი სახლს ანიავებს და ტემპერატურის შენარჩუნებაში ეხმარება. ოთახის ცენტრში ხეებიც კი იზრდება.

9. Symbiotic House, კარუიზავა

ეს სახლი პენსიაზე ახლად გასული წყვილისთვის შეიქმნა. ორი ცალკეული შენობა ერთმანეთს მინის დერეფნით უკავშირდება: ერთში მთავარი საცხოვრებელი სივრცე და საძინებელია, მეორეში კი — სტუმრების ოთახები.

10. Blurring Boundaries, კავასაკი

ეს სახლი კავასაკიში ოთხსულიან ოჯახს ეკუთვნის. სახურავიდან შემოსული სინათლე და მოძრავი ტიხრები შიდა და გარე სივრცეებს ერთმანეთთან აკავშირებს, ქვედა სართულზე ღია ვერანდაა მოწყობილი, ზემოთ კი — ბაღიანი ტერასა.