დღეს, 22 მაისს თბილისის მთავრობის სხდომაზე კალაძემ განაცხადა, რომ ილია ჭავჭავაძის გამზირზე ნაგვის ურნების მიწის ქვეშ განლაგების პროექტს იწყებს. მისი თქმით, პროექტი საპილოტეა და სხვა ქუჩების რეაბილიტაციის დროსაც მსგავსი მიდგომა ექნებათ.

"ბევრ განვითარებულ ქალაქშია ეს პროექტი. ძალიან მარტივია ამის გაკეთება და ვფიქრობ, წინგადადგმული ნაბიჯი იქნება ჩვენს ქალაქში. მე ვფიქრობ, რომ ვიზუალურადაც არ არის ლამაზი ცენტრალურ ქუჩაზე, ზემოთ ნაგვის ურნები, ეს ბევრ სხვადასხვა პრობლემას ქმნის", — აღნიშნა კახა კალაძემ.

კალაძის თქმით, მიწისქვეშა ურნებში შესაძლებელი იქნება სხვადასხვა ტიპის ნარჩენის ცალ-ცალკე ჩაყრა. ჭავჭავაძის გამზირი რეაბილიტაციისთვის თვის ბოლოდან ეტაპობრივად გადაიკეტება. გამზირზე მოეწყობა საფეხმავლო ბილიკები, დაყენდება ახალი განათებები, დაიწყება გამწვანებითი სამუშაოები და გაკეთდება საავტობუსო ზოლები.