საქართველოს მე-3 პრეზიდენტი მიხეილ სააკაშვილი საქართველოში აშშ-ს საელჩოს განცხადებას ეხმაურება, სადაც გამოთქმულია შეშფოთება საქართველოს მთავრობის სიძულვილის ენის წინააღმდეგ ბრძოლის განყოფილებისა და სიტყვის თავისუფლების შეზღუდვის მცდელობის გამო.

სააკაშვილი წერს, რომ "ის, რომ ალაპარაკდნენ [აშშ-ის საელჩო] "ნიშნავს, რომ ვაშინგტონს ყელში ამოუვიდა ივანიშვილის ვაჭრუკანა თამაშები, ხოლო ივანიშვილს ფუნდამენტურად არ ესმის ამერიკელების ის, რომ მიუნხენის კონფერენციაზე ჯეიდი ვენსმა სრულიად ნათლად თქვა, რომ ტრამპისთვის მიუღებელია, რომელ ქვეყანასაც არ უნდა ეხებოდეს საქმე, სიტყვის თავისუფლების შეზღუდვა და ოპოზიციის ლიდერების ციხეში გამოკეტვა".

"რუსეთთან ამერიკის ურთიერთობის შემდგომ დაძაბვასთან ერთად მოხდა ძალიან მნიშვნელოვანი რამ, პირველად ტრამპის მოსვლის შემდეგ, ამერიკის საელჩომ პირდაპირ გააკრიტიკა ქოცები "სიძულვილის ენის სამმართველოს" შემოღების გამო.

აქამდე ამერიკელები ყველა მწვავე საკითხებს სვამდნენ კულუარულ საუბრებში, მაგრამ საჯაროდ არაფერზე ამოუღიათ ხმა და ის, რომ ალაპარაკდნენ ნიშნავს, რომ ვაშინგტონს ყელში ამოუვიდა ივანიშვილის ვაჭრუკანა თამაშები, ხოლო ივანიშვილს ფუნდამენტურად არ ესმის ამერიკელების ის, რომ მიუნხენის კონფერენციაზე ჯეიდი ვენსმა სრულიად ნათლად თქვა, რომ ტრამპისთვის მიუღებელია, რომელ ქვეყანასაც არ უნდა ეხებოდეს საქმე, სიტყვის თავისუფლების შეზღუდვა და ოპოზიციის ლიდერების ციხეში გამოკეტვა, ივანიშვილმა ამ გამოსვლას ისეთივე წონა მიანიჭა, როგორც რომელიმე მდინარაძის ნაყრანტალევს და ვერ მიხვდა, რომ ტრამპის ფუნდამენტურ პრინციპებს ეჯახება. ხოლო ტრამპის ამერიკის გადაკიდება ივანიშვილს ბევრად უფრო ძვირი დაუჯდება ვიდრე ბაიდენის მთავრობის. თან გეოპოლიტიკურ ჭრილშიც, ვაშინგტონი ხელს უჭერს ყველა პრორუსულ ძალას, განსაკუთრებით რუსეთის სამეზობლოში, ასე რომ ეს არის ძალიან მნიშვნელოვანი შემობრუნება.

საერთოდ, მიუხედავად ბევრი ადამიანის სკეფსისისა მინდა ვთქვა, ქართველ ხალხს ყოველთვის შეუძლია ჰქონდეს ამერიკის იმედი. ბოლოსდაბოლოს ის რომ საქართველო დღეს საერთოდ არსებობს რუკაზე, დიდწილად ბუშის რესპუბლიკური ადმინისტრაციის დამსახურებაა, რომელმაც შეაჩერა რუსები თბილისთან 2008 წელს და საქართველოს უმეტესი ტერიტორიებიდან უკან დაახევინა, ქოცებს უნდათ დაგვავიწყონ ეს გადამწყვეტი ფაქტი ჩვენი ისტორიის, მაგრამ არაფერი გამოუვათ", — წერს მიხეილ სააკაშვილი სოციალურ ქსელში.

28 ივლისს "რადიო თავისუფლების" შეკითხვების საპასუხოდ საქართველოში აშშ-ის საელჩომ განაცხადა, რომ შეშფოთებულები არიან "საქართველოს მთავრობის სიძულვილის ენის წინააღმდეგ ბრძოლის განყოფილების გამო".

"ტრამპის ადმინისტრაციამ მკაფიოდ განაცხადა, რომ შეერთებული შტატები სიტყვის თავისუფლებას მიიჩნევს ფუნქციონირებადი საზოგადოების ფუნდამენტურ საფუძვლად და ჩვენ მტკიცედ ვეწინააღმდეგებით ცენზურასა და იმ შემზღუდავ კანონებს, რომლებიც გამოიყენება არასასურველი შეხედულებების მქონე ადამიანების ხმის ჩასახშობად.

...როგორც ეს ქართველ პარტნიორებსაც გავუზიარეთ, სტაბილურობა მოითხოვს პოლიტიკურ ოპოზიციას, რომელიც სახელმწიფო ინსტიტუტებთან მოქალაქეების სახელით თანამშრომლობს — იმ მოქალაქეებისა, რომლებმაც მათ ხმა მისცეს. პოლიტიკური სტაბილურობა, რომელიც შეხედულებების ფართო წარმომადგენლობით არის უზრუნველყოფილი, წარმოადგენს იმ ფაქტორების ნაწილს, რაც საქართველოს ამერიკული ინვესტიციებისთვის, უსაფრთხოების სფეროში თანამშრომლობისთვის და გრძელვადიანი სტრატეგიული პარტნიორობისთვის სანდო პარტნიორად აქცევს.

...ჩვენ შეშფოთებულნი ვართ საქართველოს მთავრობის სიძულვილის ენის წინააღმდეგ ბრძოლის სამმართველოს გამო. სიცრუესა და მცდარ შეხედულებებზე საუკეთესო პასუხი მეტი სიტყვის თავისუფლებაა და არა იძულებით დამყარებული დუმილი", — წერილობით განუცხადა აშშ-ის საელჩოს სპიკერმა "რადიო თავისუფლებას" 28 ივლისს.