სომხეთის უახლეს ისტორიაში პირველად, სომხური სამოციქულო ეკლესიის მეთაური, კათოლიკოსი გარეგინ II, სისხლის სამართლის საქმეზე სასამართლოს წინაშე წარდგება.

OC Media-ს ცნობით, საქმე ეპისკოპოს გევორგ საროიანის თანამდებობიდან გათავისუფლებას უკავშირდება. გამოძიების მტკიცებით, გარეგინ II-მ და ეკლესიის სხვა მაღალჩინოსნებმა უარი თქვეს სასამართლოს გადაწყვეტილების შესრულებაზე, რომელიც საროიანის თანამდებობაზე აღდგენას ითვალისწინებდა.

დამოუკიდებელი გამოცემა CivilNet-ის ინფორმაციით, გარეგინ II-სთან ერთად სასამართლოს წინაშე კიდევ ხუთი მაღალი იერარქიც წარდგება. მათ ბრალად ედებათ უფლებამოსილების ბოროტად გამოყენებით სასამართლოს კანონიერი გადაწყვეტილების აღსრულებისთვის განზრახ ხელის შეშლა.

ბრალდებულთა შორის არიან:

მთავარეპისკოპოსი ნათან ჰოვანისიანი;
მთავარეპისკოპოსი ჰაიკაზუნ ნაჯარიანი;
ეპისკოპოსი ვაჰან ჰოვანისიანი;
ეპისკოპოსი ედგარ ჰაკობიანი;
ეპისკოპოსი არტურ ჰაკობიანი.

CivilNet-ის ცნობით, გარეგინ II-სა და სხვა ბრალდებულ ეპისკოპოსებს ქვეყნის დატოვებაც აეკრძალათ.

გევორგ საროიანი ეკლესიის იმ წარმომადგენლებს შორის იყო, რომლებმაც პრემიერმინისტრ ნიკოლ ფაშინიანსა და ეკლესიის ხელმძღვანელობას შორის დაპირისპირების დროს ფაშინიანს მხარი დაუჭირეს. ის საჯაროდ უჭერდა მხარს პრემიერის მიერ ინიცირებულ საეკლესიო რეფორმებს, რის შემდეგაც იანვარში თანამდებობიდან გაათავისუფლეს.

მისი გათავისუფლებისას ეკლესიამ მიზეზად დაასახელა "სამსახურებრივი უფლებამოსილების ბოროტად გამოყენება, ეპარქიის წინამძღვრის მოვალეობების შეუსრულებლობა, ასევე ეპარქიის სასულიერო პირებზე ზეწოლისა და იძულების ფაქტები".

საროიანმა ეს ბრალდებები უარყო და, თავის მხრივ, განაცხადა, რომ გარეგინ II ყველა სასულიერო პირზე კომპრომატს ფლობს.

სომხეთის სასამართლომ ეკლესიას მისი თანამდებობაზე აღდგენა დაავალა. თებერვალში ხელისუფლებამ გარეგინ II-ს ქვეყნის დატოვება აუკრძალა, თუმცა ეს შეზღუდვა ორი თვის შემდეგ, აპრილში, გაუქმდა.

სომხეთის ხელისუფლებასა და ეკლესიას შორის ურთიერთობა განსაკუთრებით 2025 წლის მაისიდან დაიძაბა. მაშინ ნიკოლ ფაშინიანმა ეკლესიის ხელმძღვანელობა გააკრიტიკა და განაცხადა, რომ ის ქვეყნის მასშტაბით ტაძრების სათანადო მოვლას ვერ უზრუნველყოფდა.

მოგვიანებით ეკლესიისა და განსაკუთრებით გარეგინ II-ის მისამართით ბრალდებები კიდევ უფრო გახშირდა, ხოლო ფაშინიანმა ეტაპობრივად ცხადი გახადა, რომ კათოლიკოსის თანამდებობიდან ჩამოშორებას ცდილობდა.

მეტი გარეგინ II-ის შესახებ: