თბილისის მერმა მთავრობაში განხორციელებულ საკადრო ცვლილებზე საუბრისას თქვა, რომ რეგიონებში გამოწვევები არსებობს და მამუკა მდინარაძეს ახალ პოსტზე წარმატებები უსურვა.

"საკადრო ცვლილებების შესახებ ითქვა ბრიფინგზე, რომელიც პრემიერმინისტრმა გამართა. მე ახალს ვერაფერს დავამატებ. მინდა მამუკა მდინარაძეს წარმატებები ვუსურვო. საკმაოდ მნიშვნელოვანი და საპასუხისმგებლო მიმართულებაა რეგიონების მართვა. გამოწვევები, ცხადია, არსებობს და ამ ყველაფერს სჭირდება დარეგულირება და წარმატებებს ვუსურვებ მას", — განაცხადა კალაძემ.

საკითხის გარშემო დასმულ დამატებით კითხვებზე კალაძემ განაცხადა, რომ არ აქვს ინფორმაცია და ჟურნალისტს უთხრა, რომ მიმართოს კანცელარიას და იქ "ამომწურავად გასცემენ პასუხს.

"კომუნიკაცია მაქვს ყოველდღიური, თუმცა კიდევ ერთხელ ვიმეორებ, აღნიშნულთან დაკავშირებით, საკადრო ცვლილებებთან დაკავშირებით ეს არის პრემიერმინისტრის პრეროგატივა. პრემიერმინისტრი იღებს გადაწყვეტილებას, ვინ უნდა იყოს ესა თუ ის მინისტრი, მთავრობის წარმომადგენელი და ასე შემდეგ. თუ რაიმე კითხვები გაქვთ, მერიაში საკადრო ცვლილებებთან დაკავშირებით, მე შემიძლია ამასთან დაკავშირებით გიპასუხოთ", — განაცხადა კალაძემ.

შეგახსენებთ, რომ საქართველოს მთავრობის სტრუქტურაში ახალი — რეგიონული პოლიტიკის საკითხებში სახელმწიფო მინისტრის თანამდებობა იქმნება და ამ პოსტზე სამართალდამცავი ორგანოების კოორდინაციის საკითხებში სახელმწიფო მინისტრი მამუკა მდინარაძე ინიშნება. ამასთან, ის კვლავ შეინარჩუნებს ვიცეპრემიერის პოსტს. ამის შესახებ ბრიფინგზე მთავრობის მეთაურმა, ირაკლი კობახიძემ განაცხადა.