სახლის კარს რომ გამოაღებ, ზღურბლს გადააბიჯებ და მანამ, სანამ რაიმეს დანახვას ან გააზრებას მოასწრებ, ღრმად ჩაისუნთქავ, აუცილებლად იგრძნობ იმას, ჰაერი როგორ შეიცვალა. ეს შეიძლება, სექტემბრის პირველი, ცოტა მჭრელი სიგრილე იყოს ან მარტის თბილი, მაგრამ ტენიანი სიო.

გიფიქრია, რატომ აქვს სეზონის ცვლილებას სურნელი და ამ სურნელს კიდევ ჩვენზე ასეთი ემოციური გავლენა?

ჩვენი ყველა სხვა შეგრძნება — მხედველობა, სმენა, შეხება — გააზრებამდე სპეციალურ ფილტრს (თალამუსს) გადის, სადაც ინფორმაცია მუშავდება და ანალიზდება. ყნოსვა კი ერთადერთი შეგრძნებაა, რომელიც ამ ფილტრს გვერდს უვლის და პირდაპირ უკავშირდება ტვინის ემოციურ და მეხსიერების ცენტრს.

ფოტო: Pinterest

როცა შენ სეზონის ცვლილებას სურნელით გრძნობ, ანალიზის ნაცვლად, ტვინს ახსენდება — ბავშვობის დილა, სკოლაში წასვლის წინ გაყინულ ჰაერს რომ სუნთქავდი, გაზაფხულის საღამოების სიმსუბუქე და ა.შ.

მაგრამ გარდა მეხსიერებისა, სეზონის შეცვლისას, წმინდა ქიმიური და ფიზიკური პროცესებიც მიმდინარეობს. ჩვენი სხეული კი ამ ქიმიურ ცვლილებებს სიგნალად აღიქვამს — განახლების, თავიდან დაწყების — და გვახსენებს, რომ რუტინის მიღმა, რაღაც დიდი პროცესის ნაწილიც ვართ.

ჰოდა, როცა შემდეგ ჯერზე, გარეთ გასვლისას იგრძნობ, რომ ჰაერი სხვანაირია, ახალი სეზონი დადგა, რამდენიმე წამით გაჩერდი, ღრმად ჩაისუნთქე და შენს ნერვულ სისტემას საშუალება მიეცი, უბრალოდ იგრძნოს ეს ცვლილება.