ჯანდაცვის მინისტრ მიხეილ სარჯველაძის განცხადებით, "დღეს წარმატებით დასრულდა მოლაპარაკებები "იტალფარმაკოსთან", რომელთანაც გაფორმდა ხელშეკრულება მედიკამენტ "ჯივინოსტატის" შეძენის შესახებ. შეგახსენებთ, რომ "ჯივინოსტატი" ერთ-ერთი მედიკამენტია, რომლის საქართელოში შემოტანასაც დიუშენის დისტროფიით დაავადებული ბავშვების მშობლები ითხოვდნენ.

სარჯველაძის განმარტებით, მედიკამენტი განკუთვნილია დიუშენის კუნთოვანი დისტროფიის მქონე პაციენტებისთვის 6 წლის ასაკიდან გადაადგილების უნარის შენარჩუნებამდე.

"მადლობა მინდა გადავუხადო მშობლებს, რომლებიც სახელმწიფოს დაეხმარნენ სწორი გადაწყვეტილების მიღებაში. მშობლებთან თანამშრომლობის გაგრძელება სამინისტროსთვის ძალზედ მნიშვნელოვანია დიუშენის კუნთოვანი დისტროფიის ეფექტიანად მართვის პროცესში," — განაცხადა სარჯევლაძემ.

სარჯველაძემ მადლობა გადაუხადა იტალიურ მხარეს და დასძინა, რომ აგვისტოდან დაიწყება იმპლემენტაციის პროცესი.

"დიდი მადლობა მინდა აქვე გადავუხადო თვითონ იტალიურ მხარეს, რომელთანაც მოლაპარაკებები გვქონდა. ძალიან კარგი, კონსტრუქციული თანამშრომლობა წარიმართა.

ძალიან სწრაფად უკვე აგვისტოში პრაქტიკულად გექნება შესაძლებლობა, რომ იმპლემენტაციის პროცესის განხორციელებაზე ერთობლივად დავიწყოთ მუშაობა. ეს გულისხმობს, რა თქმა უნდა, პროტოკოლების მომზადებას, წესების მომზადებას, სათანადო კლინიკური ბაზის, მონიტორინგის — ყველა იმ ინსტრუმენტის გამოყენებას, რომელიც აუცილებელია მედიკამენტების იმპლემენტაციისთვის," — განაცხადა სარჯევლაძემ.

ჯანდაცვის მინისტრის განმარტებით, საქართველო მსოფლიოში ერთ-ერთი პირველი ქვეყანა იქნება, რომელიც "ჯივინოსტატს" შეიძენს და დაავადების მართვის სახელმწიფო პროგრამაში შეიყვანს. მეორე მედიკამენტთან დაკავშირებით მოლაპარაკებები კვლავ გრძელდება.

"რაც შეეხება მეორე მედიკამენტს, რომლის თაობაზეც ადრე საუბარი იყო საუბარი — მინდა აღვნიშნო, რომ მოლაპარაკებები რამდენიმე მიმართულებით კვლავ გრძელდება და ვიმედოვნებთ, რომ უახლოეს მომავალში წარმატებით დასრულდება, რასთან დაკავშირებითაც საზოგადოებას, ცხადია, გავუზიარებთ ინფორმაციას," — განაცხადა სარჯველაძემ.

შეგახსენებთ, 4 ივნისს დიუშენის კუნთოვანი დისტროფიით დაავადებული ბავშვების მშობლებთან შეხვედრის შემდეგ, ირაკლი კობახიძემ ბრიფინგი გამართა. კობახიძის განცხადებით, ისინი მშობელბთან შეჯერდნენ კონკრეტულ მედიკამენტებზე და სამუშაო ჯგუფი ამ მედიკამენტების უზრუნველყოფის კუთხით მუშაობა დაიწყეს.