30 ივლისს მაროკოდან ესპანეთის ჩრდილოეთაფრიკულ ქალაქ სეუტაში რამდენიმე საათის განმავლობაში 1 500-ზე მეტი მიგრანტი შევიდა. ადგილობრივმა ხელისუფლებამ მადრიდს საგანგებო მდგომარეობის გამოცხადებისა და დამატებითი ძალების გაგზავნისკენ მოუწოდა.. ქვეყნის შინაგან საქმეთა სამინისტრომ კი განაცხადა, რომ სეუტაში უსაფრთხოების უზრუნველყოფის მიზნით სამხედროები გაიგზავნებიან.

სოციალურ ქსელებში გავრცელებულ კადრებში ჩანს, როგორ კვეთენ ადამიანები საზღვარს, ნაწილი ქალაქში ზღვით შედის. მიგრანტების უმეტესობა ახალგაზრდა კაცია, თუმცა არიან ქალები და ბავშვებიც. ესპანეთის სახელმწიფო ტელევიზიის ცნობით, სეუტაში უკვე 2000-დან 3000-მდე ადამიანი შევიდა.

სეუტაში მოქმედი სამოქალაქო გვარდიის თანამშრომელთა ასოციაციის ხელმძღვანელმა, რაშიდ სბიჰიმ განაცხადა, რომ ადგილზე "აბსოლუტური ქაოსია".

ხუთშაბათს საღამოს ესპანეთის შინაგან საქმეთა სამინისტრომ განაცხადა, რომ სეუტაში დამატებით 60 სამხედრო მოსამსახურე და 30 სამოქალაქო გვარდიის თანამშრომელი გაიგზავნება.

"შეიარაღებული ძალები სამოქალაქო გვარდიას დაეხმარებიან თავისი უფლებამოსილების განხორციელებაში და საჭიროების შემთხვევაში უსაფრთხოების უზრუნველსაყოფად სხვა ამოცანებსაც შეასრულებენ," — ნათქვამია სამინისტროს განცხადებაში.

სეუტის მთავრობის ხელმძღვანელმა, ხუან ხესუს ვივასმა, 30 ივლისს სოციალურ ქსელ X-ში დაწერა.რომ "მდგომარეობა კიდევ უფრო დამძიმდა — სულ უფრო მეტი ადამიანი ჩამოდის, მიმღები ცენტრები გადატვირთულია, ზღვამ კი კიდევ ერთი ადამიანის სიცოცხლე იმსხვერპლა".

მოგვიანებით სეუტის ხელისუფლებამ განაცხადა, რომ ბოლო დღეებში ესპანურ ექსკლავში მოხვედრის მცდელობისას ცხრა ადამიანი დაიხრჩო. სააგენტო AFP აღნიშნავს, რომ ეს 2021 წლის შემდეგ მიგრანტების ყველაზე მასშტაბური ნაკადია. მაშინ სეუტის საზღვრის გადაკვეთა 10 000-ზე მეტმა ადამიანმა სცადა.

ესპანეთის პრემიერმინისტრმა, პედრო სანჩესმა, სოციალურ ქსელ X-ში განაცხადა, რომ მთავრობამ სიტუაციაზე "დაუყოვნებლივი რეაგირებისთვის ყველა საჭირო რესურსი" უკვე მობილიზება მოახდინა.

შინაგან საქმეთა მინისტრი ფერნანდო გრანდე-მარლასკა 31 ივლისს სეუტას ეწვევა. მან მაროკოს ხელისუფლებასთან თანამშრომლობა "სამაგალითოდ" შეაფასა. მისი თქმით, ორივე ქვეყანა გეგმავს, უმოკლეს ვადაში მაროკოში დააბრუნოს ყველა ის პირი, ვინც სეუტაში უკანონოდ შევიდა.