საქართველოს საგარეო საქმეთა მინისტრის, დავით ზალკალიანის ცნობით, აშშ-ის კონგრესის საგარეო ურთიერთობათა კომიტეტმა "საქართველოს მხარდამჭერი აქტი"ს მიიღო. მინისტრის თქმით, ეს არის კიდევ ერთი დადასტურება აშშ-ს კონგრესის მხრიდან, რომ საქართველოს საკითხი მთავარი სტრატეგიული პარტნიორის დღის წესრიგში "საკმაოდ მაღალ დონეზეა". ინიციატივის ავტორები დემოკრატი და რესპუბლიკელი კონგრესმენები არიან.

"ეს არის ყოვლისმომცველი დოკუმენტი, სადაც საუბარია მიუღებლობაზე ოკუპირებულ ტერიტორიაზე შექმნილი სიტუაციასთან დაკავშირებით. ის ავალებს აშშ-ს ადმინისტრაციას დააწესოს შემზღუდავი სანქციები იმ პირთა მიმართ, რომლებმაც ჩაიდინეს კრიმინალური ქმედებები ოკუპირებულ ტერიტორიაზე. არის მნიშვნელოვანი ბმა ოთხოზორია-ტატუნაშვილის სიასთან. ამ დოკუმენტში აქცენტები არის გაკეთებული საქართველოში თავდაცვისა და უსაფრთხოების სფეროში შემდგომი მხარდაჭერის მნიშვნელობაზე. ამ მიმართულებით საქართველოს თანამშრომლობა აშშ-სთან უპრეცედენტოა", — განაცხადა საქართველოს საგარეო საქმეთა მინისტრმა.

მისი თქმით, საქართველოს მხარდამჭერ აქტში საუბარია ეკონომიკური მიმართულებით თანამშრომლობის გაძლიერებაზე, არის მოწოდება თავისუფალი სავაჭრო რეჟიმის მიმართულებით შესაძლებლობის განვითარებაზე.

"აქცი მოუწოდებს აშშ-ს ადმინისტრაციას, რომ გადაიდგას კონკრეტული ნაბიჯები ამ მიმართულებით. ეს ადასტურებს, რომ საქართველო აშშ-ს დღის წესრიგში მოწინავე პოზიციაზეა", — განაცხადა დავით ზალკალიანმა.

საქართველოს პრემიერ-მინისტრმა მამუკა ბახტაძემ "აშშ-ს მხარდამჭერი ორპარტიული კანონპროექტი არის კიდევ ერთი დადასტურება იმისა, რომ საქართველოსა და აშშ-ს შორის ურთიერთობები ყველაზე მაღალ ნიშნულზეა".

პრემიერ-მინისტრის თქმით, ეს დოკუმენტი მნიშვნელოვანია იმისათვის, რომ საქართველომ აშშ-თან ურთიერთობები ხარისხობრივად ახალ დონეზე გადაიყვანოს.

"ამ დოკუმენტში მათ შორის არის მოწოდებები იმ საკითხთან დაკავშირებით, რომ შეიქმნას ხუთწლიანი გეგმა, განსაკუთრებით თავდაცვისა და უსაფრთხოების მიმართულებაში, სადაც ჩვენ შევძლებთ, ჩვენი ურთიერთობები კიდევ უფრო გავაღრმავოთ ჩვენს სტრატეგიულ პარტნიორთან. ამავე დროს, არის მნიშვნელოვანი გზავნილები ეკონომიკური თანამშრომლობის გაღრმავების საკითხში", — განაცხადა მამუკა ბახტაძემ.

საპარლამენტო უმრავლესობა ამერიკის შეერთებული შტატების წარმომადგენელთა პალატის საგარეო კომიტეტის მიერ, საქართველოს მხარდამჭერიაქტის მიღებას ეხმაურება. დეპუტატების შეფასებით, აქტის მიღება ჩვენი ქვეყნის მხარდამჭერი სერიოზული გზავნილია და კიდევ ერთხელადასტურებს, რომ საქართველოს აშშ-ის საგარეო პოლიტიკაში მნიშვნელოვანი როლი უკავია.

"მნიშვნელოვანია, რომ კანონპროექტს აქვს ორპარტიული მხარდაჭერა კონგრესში და 23 წევრთან ერთად, საქართველოს მხარდამჭერი აქტი საქართველოსთან მეგობრობის ჯგუფის თავმჯდომარეების — ჯერი კონოლის და ადამ კინზინგერის მიერ არის ინიცირებული. ეს საქართველოს მთავრობის, საქართველოს პარლამენტის და ამერიკის შეერთებულ შტატებში საქართველოს საელჩოს ერთობლივი მუშაობის შედეგია და სწორედ ამ აქტის მიღებას ლობირებდა საქართველოს საპარლამენტო დელეგაცია იანვარში ვიზიტის დროსაც", — განაცხადა საპარლამენტო უმრავლესობის ლიდერმა, არჩილ თალაკვაძემ.