საქართველოს შინაგან საქმეთა სამინისტრო 9 მაისს დაგეგმილი აქციების მონაწილეებს აფრთხილებს, რომ არ გამოიყენონ ფაშისტური და კომუნისტური სიმბოლიკა. უწყება მოუწოდებს მათ იმოქმედონ კანონის მოთხოვნათა დაცვით, წინააღმდეგ შემთხვევაში პოლიცია განახორციელებს საქართველოს კანონმდებლობით განსაზღვრულ ქმედებებს.

"2019 წლის 9 მაისს თბილისსა და საქართველოს სხვადასხვა რეგიონში დაგეგმილ აქციებთან დაკავშირებით, გვსურს საზოგადოებას ვაცნობოთ, რომ შინაგან საქმეთა სამინისტრო უზრუნველყოფს მართლწესრიგის დაცვას შეკრების ადგილებზე. ამასთან, პოლიცია იმოქმედებს კანონის შესაბამისად ყველა იმ პირის მიმართ, რომლის ქმედებაც გასცდება გამოხატვის თავისუფლების ფარგლებს და კანონის მოთხოვნებს", — ნათქვამია შსს-ს განცხადებაში.

აქვე ნათქვამია, რომ საქართველოს კანონის — "თავისუფლების ქარტია"-ს თანახმად, აკრძალულია კომუნისტური ტოტალიტარული და ფაშისტური იდეოლოგიის მატარებელი და პროპაგანდის საშუალებების გამოყენება.

9 მაისს, ფაშიზმზე გამარკვების დღეს თბილისსა და რეგიონებში აქციებია დაგეგმილი. 9 მაისს თბილისში, ჭავჭავაძის გამზირზე "გამარჯვების დღესთან" დაკავშირებით რუსეთში დაფუძნებული ორგანიზაციის, უკვდავთა პოლკის ინიციატივით მსვლელობა გაიმართება. თბილისის გარდა მსვლელობა მოეწყობა ბათუმში, ნინოწმინდაში, ახალქალაქსა და გორში.

უკვდავთა პოლკის მსვლელობის პარალელურად აქცია არა პუტინის მარშს! გაიმართება. აქციის ორგანიზატორების აზრით, "უკვდავი პოლკი პუტინის პროპაგანდისტული რეჟიმის პროექტია და კრემლის კოლაბორაციონისტულ ძალებს აძლიერებს ყველგან, სადაც ოფიციალურ მოსკოვს საკუთარი ინტერესები აქვს".