სახელმწიფო უსაფრთხოების სამსახურმა კანონით აკრძალული საბჭოური სიმბოლიკის გამოყენებაზე უკვდავთა პოლკს გაფრთხილება გაუგზავნა. როგორც უწყებაში On.ge-ს უთხრეს, გაფრთხილება სხვა ორგანიზაციებსაც დაეგზავნათ. გარდა ამისა, შსს-ში აცხადებენ, რომ ნებისმიერი პირის მხრიდან სამართალდარღვევის ჩადენის შემთხვევაში, კანონის შესაბამისად იმოქმედებენ.

9 მაისს თბილისში, ჭავჭავაძის გამზირზე "გამარჯვების დღესთან" დაკავშირებით რუსეთში დაფუძნებული ორგანიზაციის, უკვდავთა პოლკის ინიციატივით მსვლელობა გაიმართება. თბილისის გარდა მსვლელობა მოეწყობა ბათუმში, ნინოწმინდაში, ახალქალაქსა და გორში.

უკვდავთა პოლკი პროსაბჭოური ხედვებით გამოირჩევა. ორგანიზაციის საერთაშორისო საინფორმაციო ცენტრის ვებგვერდზე კი ოკუპირებული აფხაზეთი და სამხრეთ ოსეთი დამოუკიდებელ სახელმწიფოებად არის წარმოდგენილი. პოლკის მსვლელობა 9 მაისს მოეწყობა სოხუმშიც.

საქართველოში ღონისძიების ერთ-ერთი ორგანიზატორი გულბაათ რცხილაძეა. ის ევრაზიული ინსტიტუტის დამფუძნებელია, რომელიც ანტიდასავლური განცხადებებითაა ცნობილი.

უკვდავთა პოლკის მსვლელობა პირველად 2012 წლის 9 მაისს რუსეთის ქალაქ ტომსკში მოეწყო. როგორც ორგანიზაციის ვებგვერდზე წერია, მსვლელობის მონაწილეები ფოტოებითა და ბანერებით მიდიან და მეორე მსოფლიო ომის დროს დაღუპულებს მიაგებენ პატივს.

2017 წლიდან უკვდავი პოლკის მსვლელობის მოსაწყობად საერთაშორისო საინფორმაციო ცენტრი მოქმედებს, რომელიც სხვადასხვა ქვეყანაში მსვლელობებს აწყობს. წელს უკვდავთა პოლკის მსვლელობა უკვე გაიმართა ვაშინგტონში, ბრატისლავაში, ბუენოს-აირესში, სტოკჰოლმში, ანკარასა და სხვა ქალაქებში.

თბილისში უკვდავთა პოლკის პირველი მსვლელობა ორი წლის წინ ვაკის პარკში მოეწყო. იგივე მსვლელობა გაიმართა 2018 წელსაც.

თბილისის მერიაში On.ge-ს განუცხადეს, რომ მსვლელობის მოწყობასთან დაკავშირებით ჯერ ცნობა არ მიუღიათ. ბათუმის მერიაში ცნობა უკვე მიიღეს და ამბობენ, რომ ორგანიზატორებს კანონის დაცვისკენ მოუწოდებენ.