თბილისში 9 მაისს, უკვდავთა პოლკის მსვლელობის პარალელურად აქცია არა პუტინის მარშს! გაიმართება. აქციის ორგანიზატორების აზრით, "უკვდავი პოლკი პუტინის პროპაგანდისტული რეჟიმის პროექტია და კრემლის კოლაბორაციონისტულ ძალებს აძლიერებს ყველგან, სადაც ოფიციალურ მოსკოვს საკუთარი ინტერესები აქვს".

"აქციის მიზანი არ არის უკვდავთა პოლკის მსვლელობის ჩაშლა, არამედ საპირისპირო, პრო-ევროპული და პრო-ამერიკული აზრის მშვიდობიანად გაჟღერება. საქართველოს მოქალაქეებმა გააკეთეს სწორი, ევროპული არჩევანი. ახლა ამ არჩევანს სჭირდება დაცვა!" — წერენ აქციის ორგანიზატორები.

უკვდავთა პოლკი პროსაბჭოური ხედვებით გამოირჩევა, ორგანიზაციის საერთაშორისო საინფორმაციო ცენტრის ვებგვერდზე კი ოკუპირებული აფხაზეთი და სამხრეთ ოსეთი დამოუკიდებელ სახელმწიფოებად არის წარმოდგენილი. პოლკის მსვლელობა 9 მაისს მოეწყობა სოხუმში, ბათუმში, ნინოწმინდაში, ახალქალაქსა და გორში.

საქართველოში ღონისძიების ერთ-ერთი ორგანიზატორი ევრაზიული ინსტიტუტის დამფუძნებელი გულბაათ რცხილაძეა. ის ანტიდასავლური და ჰომოფობიური განცხადებებით გამოირჩევა. უკვდავთა პოლკის პირველი მსვლელობა ორი წლის წინ ვაკის პარკში მოეწყო. იგივე მსვლელობა გაიმართა 2018 წელსაც.

თბილისის მერიაში On.ge-ს განუცხადეს, რომ მსვლელობის მოწყობასთან დაკავშირებით ჯერ ცნობა არ მიუღიათ. ბათუმის მერიაში ცნობა უკვე მიიღეს და ამბობენ, რომ ორგანიზატორებს კანონის დაცვისკენ მოუწოდებენ.