ტრეფიკინგის საქმეზე დაკავებულის, იულია სუსლიაკის ადვოკატის ზურაბ თოდუას თქმით, ის გაეცნო საქმის მასალებს და აღმკვეთი ღონისძიები საკითხზე საქალაქო სასამართლომ შესაძლოა დღესვე იმსჯელოს.

მისივე ცნობით, საქმის მასალებში წერია, რომ "უკრაინელმა ქალმა 11 ბავშვი იყიდა, მათ შორის ერთი ამერიკაში, თუმცა ამის არანაირი მტკიცებულება ბრალდებას არ აქვს".

ადვოკატის განცხადებით, ყველაზე პატარა – 7 თვის ბავშვი დაბადებულია ამერიკაში სუსლიაკის ბიოლოგიური მშობიარობით და ამის დამადასტურებელი დოკუმენტები მან ასევე გადასცა გამოძიებას. რაც შეეხება მე-11 ბავშვს, რომელიც რუსეთში გარდაიცვალა, ადვოკატის თქმით, მას აქვს რუსეთში ჩატარებული გამოძიების შედეგები, სადაც წერია, რომ ბავშვი უბედური შემთხვევის შედეგად აბაზანაში დაიხრჩო.

კითხვაზე, უკავშირდება თუ არა საქმე ორგანოებით ვაჭრობას, ადვოკატი პასუხობს, რომ ამაზე არც ქართულ გამოძიებას და არც რუსეთს არაფერი უთქვამთ. ადვოკატის განცხადებით, მან გამოძიებას გადასცა დოკუმენტები, რომელიც ადასტურებს, რომ 10 ბავშვი იულია სუსლიაკის შვილია, ნაწილი მათგანი კი — სუროგაციის მეშვეობით დაიბადა.

ტრეფიკინგის საქმე

იულია სუსლიაკი, რომელიიც ამტკიცებს, რომ საქართველოში ჩამოყვანილი ათივე ბავშვი მისი შვილია 26 აპრილს დააკავეს. შსს-ს მის საქმეზე გამოძიება ტრეფიკინგის მუხლით აქვს დაწყებული. ამ ეტაპისთვის ათივე ბავშვი სახელმწიფო ზრუნვაშია გადაყვანილი.

უწყების განმარტებით, სუსლიაკი ბავშვებთან ერთად თბილისში მოსკოვიდან 8 აპრილს ჩამოვიდა და აფხაზეთში ქმართან გადასვლას აპირებდა. სამინისტროში განაცხადეს, რომ 10 მცირეწლოვანი ბავშვიდან 4 დაბადებულია 2017 წელს, ხოლო სამი 2018-ში, რამაც გააჩინა ეჭვი, რომ აღნიშნული შეიცავდა ტრეფიკინგის ნიშნებს. მისი საქმით კი გამოძიება მას მერე დაინტერესდა, რაც ბავშვები ინტოქსიკაციით ზუგდიდის საავადმყოფოში გადაიყვანეს. თვითონ ქალი ამბობს, რომ ოთხი შვილი მან გააჩინა, ხოლო ექვსი — სუროგატმა.

ასევე გახდა ცნობილი, რომ სუსლიაკმა უკრაინიდან რუსეთში 11 ბავშვი გადაიყვანა, ხოლო საქართველოში 10 ბავშვი შემოიყვანა. შსს დაკარგულ ბავშვს ინტერპოლით ეძებს. გარდა ამისა, ერთ-ერთი ბავშვი პირად საუბარში ყვება, რომ იულია სუსლიაკი დედამისი არაა და სიკვდილის შიში აქვს, ხოლო ერთი ბავშვი აშშ-ს მოქალაქეა.

მისივე თქმით, პოლიციამ ბრალდებულისა და არასრულწლოვნების დამადასტურებელი დოკუმენტები, პასპორტები ამოიღო, თუმცა შესაძლებელია, რომ დოკუმენტები იყოს ყალბი. გამოძიების პროცესში ქალისა და ბავშვების დნმ ანალიზი აიღეს და მიმდინარეობს ექსპერტიზა.

გამოძიება სისხლის სამართლის კოდექსის 143¹ მუხლის პირველი ნაწილით (ადამიანით ვაჭრობა — ტრეფიკინგი). გამოძიების ფარგლებში მიმდინარეობს თანამშრომლობა უცხოელ პარტნიორებთან.