შინაგან საქმეთა სამინისტროს წარმომადგენლის, მამუკა ჭელიძის თქმით, უკრაინელმა ქალმა, იულია სუსლიაკმა უკრაინიდან რუსეთში 11 ბავშვი გადაიყვანა, ხოლო საქართველოში 10 ბავშვი შემოიყვანა.

როგორც ჭელიძემ განაცხადა, ინტერპოლით მე-11 ბავშვის ადგილსამყოფელისა და მდგომარეობის დადგენას ცდილობენ. მისივე თქმით, ქალი ამტკიცებს, რომ ბავშვი რუსეთში უბედური შემთხვევის დროს გარდაეცვალა.

იულია სუსლიაკი, რომელიიც ამტკიცებს, რომ საქართველოში ჩამოყვანილი ათივე ბავშვი მისი შვილია დღეს, 26 აპრილს დააკავეს. შსს-ს მის საქმეზე გამოძიება ტრეფიკინგის მუხლით აქვს დაწყებული. ამ ეტაპისთვის ათივე ბავშვი სახელმწიფო ზრუნვაშია გადაყვანილი.

მამუკა ჭელიძის განცხადებით, ერთ-ერთი ბავშვი პირად საუბარში ყვება, რომ იულია სუსლიაკი დედამისი არაა და სიკვდილის შიში აქვს. ამასთანავე ერთი ბავშვი აშშ-ს მოქალაქეა:

"ოჯახს არ აქვს ფინანსური რესურსი, არ აქვს მუდმივი საცხოვრებელი ოკუპირებულ აფხაზეთში".

20 აპრილს ზუგდიდის საავადმყოფოში ათი უცხოელი ბავშვი კვებითი ინტოქსიკაციით გადაიყვანეს. ბავშვებს თან ახლდათ იულია სუსლიაკი.

როგორც შინაგან საქმეთა სამინისტროში On.ge-ს უთხრეს, ქალი 10 ბავშვით მოსკოვი-თბილისის რეისით 8 აპრილს ჩამოფრინდა და აფხაზეთში ქმართან გადასვლას აპირებდა. სამინისტროში განაცხადეს, რომ 10 მცირეწლოვანი ბავშვიდან 4 დაბადებულია 2017 წელს, რამაც გააჩინა ეჭვი, რომ აღნიშნული შეიცავდა ტრეფიკინგის ნიშნებს.

შინაგან საქმეთა სამინისტრომ დაიწყო გამოძიება სისხლის სამართლის კოდექსის 143¹ მუხლის პირველი ნაწილით (ადამიანით ვაჭრობა — ტრეფიკინგი). გამოძიების ფარგლებში მიმდინარეობს თანამშრომლობა უცხოელ პარტნიორებთან.